महाराष्ट्र संवाद न्यूज ऑनलाईन, संगमनेर:
मोबाईलमधील फोटो व्हायरल करण्याची धमकी देऊन एका २१ वर्षीय तरुणीवर वारंवार अत्याचार केल्याची धक्कादायक घटना संगमनेरमध्ये उघडकीस आली आहे. याप्रकरणी पीडित तरुणीने दिलेल्या फिर्यादीवरून संगमनेर शहर पोलिसांनी मकरंद संजय गोडगे (रा. चिंचोली गुरव, ता. संगमनेर) या तरुणाविरुद्ध गुन्हा दाखल केला आहे.
मिळालेल्या माहितीनुसार, पीडित तरुणी दुसऱ्या जिल्ह्यातील रहिवासी असून शिक्षणासाठी संगमनेरमध्ये वास्तव्यास असताना तिची मकरंद गोडगे याच्याशी सोशल मीडियाच्या माध्यमातून ओळख झाली होती. या ओळखीचे रूपांतर मैत्रीत झाल्यानंतर, सप्टेंबर २०२५ मध्ये मकरंदने तिला भेटण्यासाठी आपल्या खोलीवर बोलावले. तिथे गेल्यानंतर त्याने दोघांचे फोटो मोबाईलमध्ये काढले आणि ते फोटो सोशल मीडियावर व्हायरल करण्याची भीती दाखवून तिच्यावर अत्याचार केले.
इतकेच नव्हे तर, मकरंदने पीडित तरुणीचे ठरलेले लग्न मोडण्यासाठी टोकाचे पाऊल उचलले. ज्या मुलाशी तरुणीचे लग्न जमले होते, त्याच्या मित्रांच्या मोबाईलवर मकरंदने त्यांचे ‘रजिस्टर लग्न’ झाल्याचे खोटे कागदपत्र पाठवले, यामुळे तिचे जमलेले लग्न मोडले.
आरोपी तिला वारंवार फोन करून ‘मला भेटायला ये, नाहीतर तुझी बदनामी करेन’ अशी धमकीही देत असे. या त्रासाला कंटाळून अखेर पीडितेने पोलीस ठाण्यात धाव घेतली. सोमवारी रात्री या प्रकरणी रीतसर गुन्हा नोंदवण्यात आला असून पोलीस पुढील तपास करत आहेत.
