महाराष्ट्र संवाद न्यूज ऑनलाईन, संगमनेर:
शहरातील अग्रगण्य मानल्या जाणाऱ्या महेश नागरी सहकारी पतसंस्थेच्या नूतन पदाधिकाऱ्यांची निवड प्रक्रिया नुकतीच उत्साहात पार पडली. यामध्ये संस्थेच्या चेअरमनपदी सी.ए. कैलास सोमाणी यांची, तर व्हाईस चेअरमनपदी राजेश लढ्ढा यांची बिनविरोध निवड करण्यात आली आहे.
सहकार खात्याचे अधिकारी आर. एस. वाकचौरे यांच्या प्रमुख उपस्थितीत ही निवड प्रक्रिया झाली. यावेळी मावळते चेअरमन दिनेश सोमाणी, मावळते व्हाईस चेअरमन संतोष चांडक यांच्यासह संचालक मंडळातील अनिल अट्टल, योगेश जाजू, श्रीकांत मणियार, ज्योती कासट, विशाल नावंदर, अनिल कलंत्री, निलेश बाहेती, योगेश रहातेकर, मोरेश्वर कोथमिरे, सुदर्शन लाहोटी आणि व्यवस्थापक दिगंबर आडकी आदी उपस्थित होते.
अहिल्यानगर जिल्ह्यातील एक महत्त्वाची आर्थिक संस्था म्हणून ओळख असलेल्या महेश नागरी पतसंस्थेचा एकूण व्यवसाय २६२ कोटी रुपयांवर पोहोचला आहे. अत्यंत स्पर्धात्मक व्याजदर, गतिमान कार्यप्रणाली आणि सुलभ कर्जवाटपामुळे या संस्थेचा सर्वत्र मोठा नावलौकिक आहे. संस्थेची थकबाकी अत्यंत कमी असून, सभासदांच्या हितासाठी ही संस्था सातत्याने १५ टक्के लाभांश, दिवाळी भेट आणि वैद्यकीय मदतीसारखे उपक्रम राबवते. याशिवाय ज्येष्ठ सभासदांसाठी १० टक्के व्याजदराची ठेव योजना आणि सभासदांच्या मुलींसाठी गिफ्ट बाँड यांसारख्या नाविन्यपूर्ण योजनांमुळे संस्थेने ग्राहकांमध्ये विश्वासाचे नाते निर्माण केले आहे.
चेअरमनपदी पाचव्यांदा निवडून आल्यानंतर सी.ए. कैलास सोमाणी यांनी आपल्या भावना व्यक्त केल्या. त्यांनी सन २०२५-२६ च्या आर्थिक वर्षातील उत्कृष्ट कामगिरीबद्दल मावळते पदाधिकारी दिनेश सोमाणी आणि संतोष चांडक यांचे अभिनंदन केले. बदलत्या अर्थव्यवस्थेच्या काळात ग्राहकांना अधिक वेगवान आणि प्रगत सेवा देण्याचा मानस त्यांनी बोलून दाखवला. तसेच, संस्थापक चेअरमन दिवंगत मोहनलालजी मणियार यांनी २२ वर्षांपूर्वी लावलेल्या या रोपट्याचा आज वटवृक्ष झाला असल्याची कृतज्ञताही त्यांनी व्यक्त केली.
नूतन व्हाईस चेअरमन राजेश लढ्ढा यांनी संस्थेचा स्वनिधी वाढवण्यावर भर देणार असल्याचे सांगून कर्ज प्रक्रिया अधिक सुलभ करण्याला प्राधान्य दिले जाईल असे स्पष्ट केले. या निवडीनंतर संस्थेचे संचालक आनंद तापडे, नानासाहेब शेरमाळे, सरला आसावा आणि जयप्रकाश भुतडा यांनी नूतन चेअरमन सी.ए. कैलास सोमाणी व व्हाईस चेअरमन राजेश लढ्ढा यांचे विशेष अभिनंदन केले. निवडीचे वृत्त समजताच मोठ्या संख्येने सभासद आणि मित्रपरिवाराने उपस्थित राहून नूतन पदाधिकाऱ्यांना शुभेच्छा दिल्या असून, सर्व स्तरांतून या निवडीचे स्वागत होत आहे.
