राज्यातील आयपीएस अधिकाऱ्यांच्या मोठ्या प्रमाणावर बदल्या; अहिल्यानगरला आता मुम्मका सुदर्शन एसपी

मुंबई, विशेष प्रतिनिधी

महाराष्ट्र शासनाच्या गृह विभागाने आज राज्यातील पोलीस दलात मोठे फेरबदल करत २१ वरिष्ठ पोलीस अधिकाऱ्यांच्या बदल्यांचे आदेश निर्गमित केले आहेत. या आदेशानुसार अहिल्यानगर जिल्ह्याचे पोलीस अधीक्षक सोमनाथ घार्गे यांची बदली झाली असून, त्यांच्या जागी मुम्मका सुदर्शन यांची नियुक्ती करण्यात आली आहे. 

सोमनाथ घार्गे यांची मुंबईतील पोलीस महासंचालक कार्यालयात सहाय्यक पोलीस महानिरीक्षक पदी रवानगी झाली आहे, तर चंद्रपूरचे पोलीस अधीक्षक मुम्मका सुदर्शन आता अहिल्यानगर जिल्ह्याची सूत्रे हाती घेतील.

या बदल्यांच्या सत्रात जालना येथून अजय के. बन्सल यांची महाराष्ट्र राज्य सायबर सुरक्षा पोलीस अधीक्षक पदी, अमरावती ग्रामीणचे सिगुरी विशाल आनंद यांची धुळे पोलीस अधीक्षक पदी आणि नाशिक ग्रामीणचे बाळासाहेब पाटील यांची मुंबई शहर पोलीस उपायुक्त पदी बदली करण्यात आली आहे. परभणीचे पोलीस अधीक्षक रविंद्रसिंह परदेशी यांची राज्य गुप्तवार्ता विभागात उप आयुक्त पदी, तर संदीप घुगे यांची मुंबई शहर पोलीस उपायुक्त म्हणून वर्णी लागली आहे. नंदुरबारचे पोलीस अधीक्षक श्रवण दत्त यांची अपर पोलीस महासंचालक कार्यालयात स्टाफ ऑफिसर म्हणून नियुक्ती करण्यात आली आहे.

बदल्यांच्या या यादीत ठाणे ग्रामीणचे धोंडोपत एस. स्वामी यांची नाशिक ग्रामीणच्या पोलीस अधीक्षक पदी, वाशिमचे अनुज मिलिंद तारे यांची पुणे अमली पदार्थ विरोधी टास्क फोर्समध्ये आणि नागरी हक्क संरक्षण विभागाचे अनुराग जैन यांची मुंबई शहर पोलीस उपायुक्त पदी बदली झाली आहे. लोहमार्ग पुणे येथून अश्विनी सानप यांची नंदुरबारला, मालेगावचे अपर पोलीस अधीक्षक तेगबीर सिंह संधू यांची जालन्याला, तर पुणे शहरचे पोलीस उपायुक्त राजकुमार शिंदे यांची लोहमार्ग पुणे येथे पोलीस अधीक्षक म्हणून बदली करण्यात आली आहे.

अमली पदार्थ विरोधी टास्क फोर्सचे निकेश खाटमोडे यांची वाशिम येथे, जालन्याचे अपर पोलीस अधीक्षक आयुष नोपानी यांची चंद्रपूर येथे आणि अमरावती ग्रामीणचे पंकज कुमावत यांची परभणी येथे पोलीस अधीक्षक म्हणून नियुक्ती झाली आहे. नागपूरचे पोलीस उपायुक्त निकेतन कदम यांची अमरावती ग्रामीणला, परभणीचे अपर पोलीस अधीक्षक सुरज गुजाल यांची मालेगावला, तर फोर्स वनचे गजानन राजमाने यांची मुंबई शहर पोलीस उपायुक्त पदी बदली करण्यात आली आहे.

तसेच दत्ता लक्ष्मण तोटेवाड यांची अमरावती येथे पोलीस अधीक्षक म्हणून नियुक्ती झाली आहे. हे सर्व आदेश ३० एप्रिल २०२६ रोजी जारी करण्यात आले असून, संबंधित अधिकाऱ्यांना तात्काळ पदभार स्वीकारण्याच्या सूचना देण्यात आल्या आहेत.