महाराष्ट्र संवाद न्यूज ऑनलाईन, नाशिक
भोंदू कॅप्टन अशोक खरात याची न्यायालयीन कोठडीत रवानगी झाल्यानंतर त्याला पुन्हा दुसऱ्या गुन्ह्यात अटक करून न्यायालयासमोर उभे करण्यात आले. अवतार पूजेच्या नावाखाली व्यावसायिकाला एक कोटीहून अधिक रुपयांचा गंडा घालणाऱ्या अशोक खरातला न्यायालयाने चार मे पर्यंत पोलीस कोठडीत ठेवण्याचे आदेश दिले.
व्यवसाय जगभरात विस्तारण्याच्या इच्छेचा गैरफायदा घेत आरोपी खरातने एका व्यावसायिकाला १ कोटी ११ लाख रुपयांना गंडा घातल्याचे तपासात समोर आले. आहे. आरोपीने फिर्यादीला ‘अवतार पूजा’ करण्याचे आमिष दाखवून ईशान्येश्वर मंदिर परिसरात बोलावले आणि तिथे बनावट साप दाखवून मृत्यूची भीती घातली. ही पूजा पूर्ण करण्यासाठी २१ देशांत जावे लागेल, अन्यथा नागदंश होऊन मृत्यू होईल, अशी भीती दाखवून आरोपीने फिर्यादीकडून मोठी रक्कम उकळली. इतकेच नव्हे तर ‘परिस शक्ती’ प्राप्त झाल्यावर व्यवसायात भरभराट होईल असे सांगून फिर्यादीची मर्सिडीज कार आणि तुर्कस्थानमधून महागडे फर्निचरही स्वतःच्या फायद्यासाठी घेतल्याचा आरोप आहे.
न्यायालयात सरकारी वकिलांनी या प्रकरणाचे गांभीर्य मांडताना स्पष्ट केले की, ही केवळ आर्थिक फसवणूक नसून जादूटोण्याच्या आडून महिलांचे लैंगिक शोषण केल्याचेही प्रकार घडले आहेत. या संपूर्ण प्रकरणाच्या सखोल तपासासाठी विशेष तपास पथकाची (SIT) स्थापना करण्यात आली आहे. दुसरीकडे, आरोपीच्या वकिलांनी हे सर्व आरोप फेटाळून लावत फिर्यादीने दिलेल्या वस्तू या स्वेच्छेने दिलेली ‘भेट’ असल्याचा दावा केला. तसेच एका कर्मचाऱ्याने अश्लील व्हिडीओ चित्रीत करून ते इतरांना पुरवल्याचा प्रतिवादही बचाव पक्षाने केला.
मात्र, तपास अधिकाऱ्यांनी बचाव पक्षाचे दावे खोडून काढत तपासाची दिशा स्पष्ट केली आणि आरोपीच्या कोठडीची मागणी लावून धरली. दोन्ही बाजूंचा युक्तिवाद ऐकून घेतल्यानंतर न्यायालयाने आरोपी खरातला ४ मे पर्यंत पोलीस कोठडी सुनावली आहे. या प्रकरणातील नवव्या गुन्ह्यात आता एसआयटीकडून पुढील तपास केला जात आहे.
