मुंबई:
नाशिकचा स्वयंघोषित भोंदूबाबा अशोक खरात याच्याशी असलेल्या आर्थिक संबंधांच्या संशयावरून अंमलबजावणी संचालनालयाने (ईडी) राज्य महिला आयोगाच्या माजी अध्यक्षा रुपाली चाकणकर यांच्या भगिनी प्रतिभा चाकणकर यांना समन्स बजावले आहे. पुढील आठवड्यात त्यांची चौकशी होण्याची शक्यता असल्याने राजकीय वर्तुळात मोठी खळबळ उडाली असून हा चाकणकर यांच्यासाठी मोठा धक्का मानला जात आहे.
पोलीस तपासात समोर आलेल्या माहितीनुसार, अशोक खरात आणि प्रतिभा चाकणकर यांच्यात मोठ्या प्रमाणावर आर्थिक देवाणघेवाण झाल्याचे संशयित व्यवहार आढळले आहेत. समता नागरी सहकारी पतसंस्थेतील संशयास्पद व्यवहारांशी संबंधित सुमारे ३ ते ५० कोटी रुपयांची उलाढाल प्रतिभा चाकणकर यांच्या बँक खात्यातून झाल्याचा प्राथमिक अंदाज व्यक्त केला जात आहे. विशेष म्हणजे, याच पतसंस्थेत अशोक खरात हा शेकडो खात्यांचा वारसदार (नॉमिनी) असल्याचेही तपासात निष्पन्न झाले आहे.
या प्रकरणातील तांत्रिक तपासात आणखी एक धक्कादायक बाब समोर आली असून, प्रतिभा चाकणकर आणि अशोक खरात यांच्यात जवळपास २३६ वेळा फोनवर बोलणे झाले आहे. स्वतः रुपाली चाकणकर यांनीही खरातसोबत ३३ हजार सेकंदांपेक्षा जास्त वेळ संवाद साधल्याचा दावा केला जात आहे. यापूर्वी रुपाली चाकणकर यांनी खरातशी कोणताही आर्थिक संबंध नसल्याचे स्पष्ट केले होते, मात्र आता त्यांच्या कुटुंबातील सदस्यांच्या नावे असलेल्या बँक खात्यांमधील कोट्यवधींच्या व्यवहारामुळे तपास यंत्रणांनी आपला मोर्चा त्यांच्याकडे वळवला आहे. खरातवर महिला अत्याचारासारखे गंभीर गुन्हेही दाखल असल्याने हे प्रकरण अधिक गुंतागुंतीचे बनले आहे.
