महाराष्ट्र संवाद न्यूज ऑनलाईन | शिर्डी:
राज्यभरात आपल्या भोंदूपणाने आणि आर्थिक गैरव्यवहाराने खळबळ उडवून देणाऱ्या अशोक खरात याला शिर्डी पोलिसांनी फसवणूक प्रकरणी नाशिकमधून अटक केल्यानंतर आता न्यायालयीन प्रक्रियेत मोठा निर्णय झाला आहे. राहता न्यायालयाने आरोपी अशोक खरात याला ९ मे पर्यंत पोलीस कोठडी सुनावली आहे.
आतापर्यंत एसआयटीच्या ताब्यात असलेल्या आणि नऊ गुन्ह्यांचा तपास करणाऱ्या एसआयटी कडून खरातचा ताबा शिर्डी पोलिसांना मिळाल्यानंतर त्याला मंगळवारी राहता न्यायालयात हजर करण्यात आले होते. यावेळी पोलिसांनी आठ दिवसाच्या कोठडीची मागणी केली होती. न्यायालयाने दिलेल्या या वाढीव कोठडीमुळे आता या प्रकरणातील अनेक धक्कादायक बाबी समोर येण्याची शक्यता निर्माण झाली आहे.
अशोक खरात आणि त्याच्या पत्नीवर शिर्डी पोलीस ठाण्यात गंभीर स्वरूपाचे गुन्हे दाखल करण्यात आले आहेत. यामध्ये प्रामुख्याने भोंदूपणा करून लोकांची दिशाभूल करणे, मोठ्या प्रमाणावर आर्थिक फसवणूक, जमिनींचे बेकायदेशीर व्यवहार आणि अनधिकृत सावकारी अशा आरोपांचा समावेश आहे. या प्रकरणाची व्याप्ती मोठी असून रावसाहेब गोंदकर नावाच्या शेतकऱ्याला विविध प्रलोभने दाखवून या दाम्पत्याने मोठा आर्थिक गंडा घातल्याचे तपासात निष्पन्न झाले आहे.
या आरोपींची कार्यपद्धती अत्यंत नियोजनबद्ध होती. सुरुवातीला भोंदूपणाच्या जोरावर लोकांचा विश्वास संपादन करायचा आणि त्यानंतर संधी मिळताच त्यांच्या मालमत्तेवर डल्ला मारायचा, असा त्यांचा शिरस्ता होता. पोलिसांनी दिलेल्या माहितीनुसार, खरात याला ताब्यात घेतल्यानंतर राहता ग्रामीण रुग्णालयात त्याची वैद्यकीय तपासणी करण्यात आली आणि त्यानंतर त्याला पोलीस कोठडीत ठेवून रात्रभर कसून चौकशी करण्यात आली.
सध्या पोलीस या प्रकरणाच्या मुळाशी जाण्याचा प्रयत्न करत आहेत. आगामी तपासात या दाम्पत्याने आणखी किती लोकांची फसवणूक केली आहे आणि या संपूर्ण गैरव्यवहारातील आर्थिक आकडा नेमका किती कोटींच्या घरात आहे, याचे सत्य बाहेर येईल. ९ मे पर्यंत मिळालेल्या या कोठडीत पोलिसांच्या हाती आणखी काही महत्त्वाची कागदपत्रे आणि पुरावे लागण्याची शक्यता वर्तवण्यात येत आहे.
