महाराष्ट्र संवाद न्यूज ऑनलाईन, जामखेड:
नगरपरिषदेमध्ये आपल्या मुला-मुलीचा जन्मदाखला मिळवण्यासाठी गेलेल्या तक्रारदाराकडून तीन हजार रुपयांची लाच स्वीकारणाऱ्या दोन कर्मचाऱ्यांना लाचलुचपत प्रतिबंधक विभागाने रंगेहाथ पकडले आहे.
या कारवाईमुळे जामखेड तालुक्यात मोठी खळबळ उडाली असून, जन्म-मृत्यू नोंदणी विभागातील लिपिक अभिजित जालीम भैसडे आणि कंत्राटी मदतनीस अहमद इलियास शेख अशी पकडण्यात आलेल्या दोघांची नावे आहेत.
या प्रकरणातील तक्रारदाराने नोव्हेंबर २०२५ मध्ये आपल्या मुलांच्या जन्मदाखल्यासाठी नगरपालिकेकडे आवश्यक कागदपत्रांसह अर्ज केला होता. हे दाखले देण्यासाठी लिपिक भैसडे याने दीड हजार रुपये प्रति दाखला याप्रमाणे तीन हजार रुपयांची मागणी केली होती. लाचेची ही रक्कम अग्निशमन दलातील कंत्राटी मदतनीस अहमद शेख याच्याकडे देण्यास सांगण्यात आले होते.
याबाबत तक्रारदाराने ५ मे रोजी नाशिक येथील लाचलुचपत प्रतिबंधक विभागाकडे तक्रार नोंदवली. त्यानंतर ६ मे रोजी विभागाने सापळा रचला आणि अहमद शेख याला लाचेची रक्कम स्वीकारताना रंगेहाथ पकडले. या गुन्ह्यात लाचेला प्रोत्साहन दिल्याचा ठपका ठेवून लिपिक भैसडे यालाही एसीबीने ताब्यात घेतले आहे.
या कारवाईनंतर आमदार रोहित पवार यांनी सत्ताधारी भारतीय जनता पक्षावर जोरदार हल्लाबोल केला आहे. नगरपरिषदेतील या भ्रष्ट कारभाराचा आज पंचनामा झाला असल्याचे सांगतानाच, कारवाई झालेले कर्मचारी हे केवळ छोटे मासे आहेत, अशी टीका त्यांनी केली. प्रशासनातील भ्रष्टाचाराचा मुख्य सूत्रधार असलेला ‘मोठा मासा’ अद्याप बाहेरच असून, त्याला वाचवण्याचा प्रयत्न भाजप करत असल्याचा आरोपही पवार यांनी केला. या मोठ्या माशाला जाळ्यात ओढून बाहेर काढण्याची गरज असल्याचे त्यांनी स्पष्ट केले आहे.
ही कारवाई नाशिक परिक्षेत्राचे पोलीस अधीक्षक भारत तांगडे, अपर पोलीस अधीक्षक माधव रेड्डी आणि सुनील दोरगे यांच्या मार्गदर्शनाखाली पोलीस उपाधिक्षक अजित त्रिपुटे यांच्या पथकाने यशस्वी केली. या पथकात पोलीस निरीक्षक राजू आल्हाट, चंद्रकांत काळे, किशोर कुळधर, शेखर वाघ आणि दशरथ लाड यांचा समावेश होता. या प्रकरणाचा पुढील तपास पोलीस उपाधिक्षक अजित त्रिपुटे करत आहेत.
