महाराष्ट्र संवाद न्यूज ऑनलाईन, संगमनेर:
हिंदुहृदयसम्राट बाळासाहेब ठाकरे यांच्या जन्मशताब्दी वर्षाचे औचित्य साधून संगमनेर शहर व तालुका शिवसेना (उद्धव बाळासाहेब ठाकरे) पक्षाच्या वतीने भव्य व्यंगचित्र स्पर्धा २०२६ चे आयोजन करण्यात आले आहे.
पक्षप्रमुख उद्धव ठाकरे यांच्या आदेशानुसार आणि शिवसेना नेते खासदार संजय राऊत, खासदार अनिल देसाई, संपर्कप्रमुख आमदार सुनील शिंदे विधानसभा संपर्कप्रमुख सूर्यकांत शिंदे व जिल्हाप्रमुख सचिनभाऊ कोते पाटील यांच्या मार्गदर्शनाखाली हा उपक्रम राबवला जात असून, उपजिल्हाप्रमुख अमर कतारी यांच्या नेतृत्वात वर्षभर चालणाऱ्या सामाजिक व सांस्कृतिक उपक्रमांचा हा एक महत्त्वाचा भाग असल्याचे आयोजकांनी सांगितले.
ही स्पर्धा येत्या रविवारी, (१७ मे २०२६) सकाळी ९:०० ते १०:३० या वेळेत संगमनेर बस स्थानकाजवळील दत्त मंदिर येथे पार पडणार आहे. स्पर्धेचा निकाल आणि बक्षीस वितरण सोहळा त्याच दिवशी सकाळी ११:०० वाजता संपन्न होईल. स्पर्धेचे नियोजन शहर प्रमुख अमित चव्हाण व फैसल सय्यद यांनी केले असून, नामवंत परीक्षकांच्या उपस्थितीत ही स्पर्धा पार पडणार आहे.
स्पर्धेसाठी दोन गट करण्यात आले असून खुल्या गटासाठी महागाई, राजकारणातील भ्रष्टाचार, शेतकरी समस्या, बेरोजगारी आणि लोकशाही-निवडणूक असे ज्वलंत विषय देण्यात आले आहेत. विद्यार्थी गटासाठी मोबाईलचा अतिवापर, पर्यावरण संरक्षण, पाणी बचत, ऑनलाईन शिक्षण व सोशल मीडिया हे विषय निश्चित करण्यात आले आहेत.
पारितोषिकांचे स्वरूप आकर्षक असून खुल्या गटात प्रथम ७ हजार, द्वितीय ५ हजार आणि तृतीय ३ हजार रुपये रोख, ट्रॉफी व प्रमाणपत्र दिले जाईल. विद्यार्थी गटात प्रथम ५ हजार, द्वितीय ३ हजार आणि तृतीय २ हजार रुपये रोख व सन्मानचिन्ह देऊन विजेत्यांचा गौरव करण्यात येणार आहे.
इच्छुक स्पर्धकांनी १४ मे २०२६ पर्यंत आपली नावनोंदणी पूर्ण करणे आवश्यक आहे. स्पर्धकांना आयोजकांकडून केवळ कागद पुरवला जाईल, तर इतर आवश्यक साहित्य स्वतः आणायचे आहे. या उपक्रमाच्या यशस्वीतेसाठी शिवसेनेचे विविध पदाधिकारी व महिला आघाडी, युवा सेनेचे कार्यकर्ते परिश्रम घेत आहेत. संगमनेरमधील जास्तीत जास्त कलाप्रेमींनी या स्पर्धेत सहभागी व्हावे, असे आवाहन उपजिल्हाप्रमुख अमर कतारी यांनी केले आहे.
