महाराष्ट्र संवाद न्यूज ऑनलाईन, संगमनेर:
रविवारी सायंकाळी संगमनेरमध्ये प्रसिद्ध कीर्तनकार व प्रवचनकार ह. भ. प. विकास लवांडे यांच्या व्याख्यानाचे आयोजन करण्यात आले असून ते संतांचा वारकरी संप्रदाय या विषयावर बोलणार आहे. वारकरी संप्रदायाचा इतिहास, संतांचे विचार आणि त्यांचे आजच्या समाजातील महत्त्व यावर ह.भ.प. लवांडे हे सविस्तर प्रकाश टाकणार आहेत.
येथील सत्यशोधक विचारमंचाच्या वतीने या व्याख्यानमालेचे आयोजन करण्यात आले आहे. या व्याख्यानमालेचे हे पाचवे पुष्प असून, यात ‘संतांचा वारकरी संप्रदाय’ या महत्त्वपूर्ण विषयावर प्रबोधन होणार आहे.
या कार्यक्रमासाठी प्रमुख व्याख्याते म्हणून प्रसिद्ध कीर्तनकार आणि प्रवचनकार ह.भ.प. विकास लवांडे उपस्थित राहणार असून ते उपस्थितांना मार्गदर्शन करणार आहेत.
हा कार्यक्रम रविवारी, (२४ मे २०२६) सायंकाळी ६:०० वाजता आयोजित करण्यात आला आहे. संगमनेर येथील पडतानी कॉम्प्लेक्समधील व्यापारी असोसिएशन हॉलमध्ये हा व्याख्यानाचा कार्यक्रम पार पडणार आहे.
सत्यशोधक विचारमंचाकडून नेहमीच वैचारिक आणि प्रबोधनात्मक कार्यक्रमांचे आयोजन केले जाते. याच परंपरेचा भाग म्हणून या पाचव्या व्याख्यान पुष्पाचे आयोजन करण्यात आले आहे. या अभ्यासपूर्ण आणि प्रबोधनात्मक व्याख्यानाचा लाभ घेण्यासाठी संगमनेर शहर व परिसरातील नागरिकांनी, इतिहासप्रेमींनी आणि भाविकांनी मोठ्या संख्येने उपस्थित राहावे, असे आवाहन सत्यशोधक विचारमंचाच्या वतीने करण्यात आले आहे.
