कथित वारकऱ्यांच्या बुवाबाजीवर सवाल करणाऱ्या लवांडेना अटक

विशेष प्रतिनिधी / मुंबई

वारकरी संप्रदायात घुसखोर असल्याचं म्हणत विकास लवांडे यांनी काही जणांची यादी जाहीर केली होती. याप्रकरणी वाघोली पोलीस ठाण्यात विकास लवांडे यांच्याविरोधात दाखल केलेल्या तक्रारीनुसार गुन्हा दाखल नोंदवण्यात आला होता. पण, लवांडेंना अतिरिक्त सत्र न्यायालयाने 20 मेपर्यंत अटकपूर्ण जामीन मंजूर केला होता. तसेच तपास अधिकारी, सरकारी पक्ष आणि वाघोली पोलिसांना भूमिका मांडण्याचे निर्देश दिले होते. मात्र 20 तारीख पूर्ण होताच पुण्यातील वाघोली पोलिसांनी विकास लवांडे यांना अटक केली आहे.

याप्रकरणी आता संताप व्यक्त करताना राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांनी गृहमंत्री देवेंद्र फडणवीस यांच्यावर निशाणा साधला आहे. सुप्रिया सुळे यांनी ‘X’ या सोशल मीडिया प्लॅटफॉर्मवर, राष्ट्रवादी काँग्रेस पार्टी शरदचंद्र पवार पक्षाचे प्रवक्ते विकास लवांडे यांना अटक करण्यातच्या कृतीचा जोरदार निषेध केला आहे.

राज्याचं गृहखातं नेमकं कोणत्या दिशेने काम करतंय? हा प्रश्न उपस्थित व्हावा, अशी ही गेल्या काही दिवसांतील पुणे शहर आणि परिसरातील प्रमुख हिंसक घटनांची ही यादी. गुन्हेगारीबाबत महाराष्ट्रात पुणे शहराचा पहिला तर भारतात पाचवा क्रमांक लागतो. केंद्र सरकारची आकडेवारीच हे स्पष्टपणे सांगत आहे. दिवसाढवळ्या खून होतात, गॅंगवॉर होते, रस्त्यावर रक्तपात होतो, महिलांवर-चिमुरड्यांवर अत्याचार होतो, राजकीय कार्यकर्त्यांना अटक होते आणि गुंडांना मात्र मोकळं रान मिळतं. या सर्व गोष्टी राज्याच्या कायदा सुव्यवस्थेची स्थिती सांगायला पुरेशा आहेत, अशा शब्दात सुळे यांनी राज्यातील गुन्हेगारीवर भाष्य केलं.

देवेंद्र फडणवीस यांना उद्देशून सुप्रिया सुळे म्हणाल्या की, जनता प्रश्न विचारतेय की, हिंसेचं हे रक्तरंजीत दुष्टचक्र कधी थांबणार आहे का? एवढ्या घटना सातत्याने आसपास घडत असताना देखील गृहखातं हाताची घडी, तोंडावर बोट अशा अवस्थेत का बसलंय? जनतेला उत्तरं हवी आहेत आणि कठोर कृती देखील. जनता दहशतीच्या छायेखाली असताना गृहमंत्रालय मात्र सुस्त आहे. गुन्हेगारांना फ्री हॅंड द्यायचा आणि दुसरीकडे विकास लवांडे यांच्यासारख्या राजकीय कार्यकर्त्यांना सूड भावनेतून अटक करायची, ही कुठली पद्धत? असा प्रश्न उपस्थित करत सुप्रिया सुळे म्हणाल्या, महाराष्ट्राचे मुख्यमंत्री देवेंद्र फडणवीस जनता आपल्याकडून न्याय मागतेय.

दरम्यान, वारकरी संप्रदायाबद्दल केलेल्या वक्तव्याप्रकरणी गुन्हा दाखल झाल्यानंतर विकास लवांडे यांना अतिरिक्त सत्र न्यायालयाने 20 मेपर्यंत अटकपूर्ण जामीन मंजूर केला होता. मात्र विकास लवांडे यांनी अटकपूर्व जामिनाच्या अर्जात स्वत:विरोधातील पूर्वी दाखल असलेल्या 4 गुन्ह्यांची माहिती लपविल्याचं समोर आलं. त्यामुळे सरकारी वकील राजेश कावेडिया यांनी न्यायालयात आक्षेप घेत लवांडेंच संरक्षण रद्द करण्याची मागणी केली होती.

न्यायालयाने हा युक्तिवाद ग्राह्य धरत विकास लवांडे यांना अटकपूर्व जामीन रद्द केला होता. न्यायालयाच्या निर्णयानंतर पोलिसांनी तत्काळ विकास लवांडे यांना अटक केली. मात्र दुसरीकडे छत्रपती शिवारायांची बदनामी करणाऱ्या सत्ताधारी समर्थक कथित वारकऱ्यांची गृह खात्याने जराही दखल न घेतल्याबद्दल वारकऱ्यांनी तीव्र निषेध केला आहे.