संगमनेरमध्ये घरफोडी; सव्वादोन लाखांचे सोन्या-चांदीचे दागिने आणि रोकड लंपास

महाराष्ट्र संवाद न्यूज ऑनलाईन, संगमनेर: 

तालुक्यातील चिंचोली गुरव शिवारातील पारेगाव रोड येथील आभाळे वस्तीवर एक धक्कादायक घरफोडीची घटना समोर आली आहे. एका अज्ञात चोराने बंद घराचे कुलूप तोडून घरात प्रवेश करत सुमारे २ लाख १३ हजार ५०० रुपयांचे सोन्या-चांदीचे दागिने आणि रोख रक्कम चोरून नेली आहे. या प्रकरणी संगमनेर तालुका पोलीस स्टेशनमध्ये गुन्हा दाखल करण्यात आला आहे.

याबाबत पोलीस सूत्रांकडून मिळालेल्या माहितीनुसार, फिर्यादी नितीन गंगाधर सोनवणे (वय ४३, रा. पारेगाव रोड, आभाळे वस्ती, चिंचोली गुरव, ता. संगमनेर) आपल्या कुटुंबासह राहत असून गुरुवारी (दिनांक २१ मे २०२६) रात्री ११:३० वाजेच्या सुमारास ते झोपलेले होते. त्यावेळी घर बंद असताना, शुक्रवारी (दिनांक २२ मे २०२६) पहाटे ४:३० वाजेच्या दरम्यानच्या काळात अज्ञात चोरट्याने त्यांच्या घरात प्रवेश केला. चोरट्याने स्वतःच्या आर्थिक फायद्यासाठी घरातील मौल्यवान ऐवजावर डल्ला मारला.

या घरफोडीमध्ये एकूण २ लाख १३ हजार ५०० रुपयांचा मुद्देमाल चोरीला गेला आहे. यामध्ये ६० हजार रुपये किमतीचे १ तोळा वजनाचे सोन्याचे मणी व काळे मणी असलेले मणिमंगळसूत्र, ६० हजार रुपयांचे तसेच दुसरे एक तोळ्याचे मणिमंगळसूत्र, २४ हजार रुपये किमतीचे ४ ग्रॅम वजनाचे सोन्याचे कानातले टॉप्स आणि साखळीचे लटकन, १८ हजार रुपये किमतीचे ३ ग्रॅमचे सोन्याचे टॉप्स, ३० हजार रुपये किमतीचे ५ ग्रॅम वजनाचे सोन्याचे मणी व दोन सोन्याची वाटी असलेले मणिमंगळसूत्र, १५०० रुपये किमतीची चांदीची चैन व अंगठी आणि घरात ठेवलेली २० हजार रुपयांची रोख रक्कम असा मुद्देमाल अज्ञात चोरट्याने लंपास केला आहे.

घटनेची माहिती मिळताच संगमनेर तालुका पोलीस स्टेशनचे पोलीस निरीक्षक प्रवीण साळुंखे आणि पोलीस उपनिरीक्षक सातपुते यांनी सहकाऱ्यांसह घटनास्थळाला भेट दिली. गुन्ह्याचे गांभीर्य ओळखून तातडीने श्वानपथक, फिंगर प्रिंट तज्ज्ञ आणि फॉरेन्सिक लॅबच्या पथकालाही पाचारण करण्यात आले होते. या पथकाने घटनास्थळावरून महत्त्वाचे पुरावे गोळा केले आहेत.

फिर्यादी सोनवणे यांनी दिलेल्या तक्रारीनुसार पोलिसांनी तात्काळ गुन्हा दाखल केला आहे. या प्रकरणी अज्ञात चोरट्याविरुद्ध भारतीय न्याय संहिता (BNS) कलम ३३१(४) आणि ३०५ अन्वये गुन्हा नोंदवण्यात आला असून, पुढील तपास वरिष्ठ अधिकाऱ्यांच्या मार्गदर्शनाखाली पोलीस उपनिरीक्षक एस. एस. सातपुते या करत आहेत. या घटनेमुळे परिसर भागात घबराटीचे वातावरण पसरले असून पोलिसांनी रात्रीची गस्त वाढवावी अशी मागणी होत आहे.