राजधानीत लोककलेचा ऐतिहासिक गौरव: रघुवीर खेडकर यांना राष्ट्रपतींच्या हस्ते ‘पद्मश्री’; संगमनेरसह अहिल्यानगर जिल्ह्यात आनंदोत्सव

महाराष्ट्र संवाद न्यूज ऑनलाईन, संगमनेर:

महाराष्ट्राच्या मातीतील जिवंत लोककला असलेल्या तमाशा क्षेत्रासाठी आपले संपूर्ण आयुष्य समर्पित करणारे संगमनेर तालुक्याचे सुपुत्र रघुवीर खेडकर यांचा नवी दिल्ली येथील राष्ट्रपती भवनात ‘पद्मश्री’ पुरस्काराने गौरव करण्यात आला. राष्ट्रपती महामहीम द्रौपदी मुर्मू यांच्या हस्ते खेडकर यांना हा सर्वोच्च नागरी पुरस्कार प्रदान करण्यात आला.

राष्ट्रपती द्रोपदी मुर्मू यांच्या हस्ते खेडकर यांना पद्मश्री चे वितरण करण्यात आले. या ऐतिहासिक सोहळ्याला देशाचे पंतप्रधान नरेंद्र मोदी, केंद्रीय मंत्री अमित शहा आणि विविध क्षेत्रांतील दिग्गज मान्यवर उपस्थित होते.

रघुवीर खेडकर यांना मिळालेल्या या बहुमानामुळे अहिल्यानगर जिल्ह्याचा मोठा सन्मान झाला असून, संगमनेरकरांसाठी हा क्षण अत्यंत अभिमानास्पद आणि आनंदाचा ठरला आहे, अशा शब्दांत राज्याचे ज्येष्ठ नेते व माजी मंत्री बाळासाहेब थोरात यांनी आपल्या भावना व्यक्त केल्या आहेत.

रघुवीर खेडकर यांनी पद्मश्री स्वीकारल्यानंतर त्यांचे अभिनंदन करताना बाळासाहेब थोरात म्हणाले की, स्वर्गीय कांताबाई सातारकर यांचा समृद्ध आणि वैभवशाली सांस्कृतिक वारसा रघुभाऊंनी अत्यंत समर्थपणे पुढे चालवला आहे. आजच्या आधुनिक आणि सोशल मीडियाच्या जमान्यात पारंपरिक लोककला लोप पावते की काय, अशी भीती निर्माण झाली असताना रघुभाऊंनी या जिवंत लोककलेला पुन्हा एकदा लोकमान्यता मिळवून देण्यासाठी अहोरात्र कष्ट घेतले. महाराष्ट्र तमाशा मालक मंडळाचे अध्यक्ष म्हणून काम करताना त्यांनी तमाशा कलावंतांच्या हक्कासाठी आणि विविध प्रश्नांसाठी शासन दरबारी सातत्याने यशस्वी पाठपुरावा केला आहे. त्यांच्या रूपाने तमाशा क्षेत्रातील एका खऱ्या आणि सच्चा कलावंताचा हा राष्ट्रीय गौरव झाला असून संपूर्ण जिल्हा या क्षणाचा अभिमान बाळगत आहे.

याच पार्श्वभूमीवर ज्येष्ठ नेते व माजी आमदार डॉ. सुधीर तांबे यांनी रघुभाऊंच्या अष्टपैलू व्यक्तिमत्त्वाचा गौरव केला. रघुभाऊंनी केवळ कलेचीच सेवा केली नाही, तर कलेसोबतच अध्यात्माच्या माध्यमातूनही समाजसेवा केली आहे. आयुष्यभर लोककलेशी प्रामाणिक राहणाऱ्या अशा कलावंताचा सन्मान होणे हा तमाशा क्षेत्राला नवसंजीवनी देणारा क्षण असल्याचे त्यांनी म्हटले.

आमदार सत्यजित तांबे यांनी, रघुभाऊंनी तमाशा फड सांभाळताना राज्यातील हजारो कलाकारांची जबाबदारी पालकासारखी स्वीकारल्याचे नमूद केले. या पद्मश्री पुरस्कारामुळे समाजात तमाशा कलावंतांना पाहण्याचा दृष्टिकोन बदलेल आणि त्यांना अधिक मानसन्मान मिळेल, असा विश्वास त्यांनी व्यक्त केला.

रघुभाऊंच्या कलेचे वैशिष्ट्य सांगताना माजी नगराध्यक्ष दुर्गाताई तांबे म्हणाल्या की, त्यांनी महाराष्ट्रात अत्यंत लोकप्रिय केलेले ‘समई नृत्य’ आणि ‘थाळी नृत्य’ आज थेट दिल्ली दरबारी पोहोचले आहे. हा पुरस्कार म्हणजे त्यांच्या आयुष्यातील संघर्षाला आणि विशेषतः समई नृत्याला संपूर्ण देशाने दिलेली मोठी दाद आहे.

युवा नेत्या डॉ. जयश्रीताई थोरात यांनी देखील हा क्षण संगमनेर तालुक्याच्या इतिहासातील अत्यंत आनंददायी आणि सुवर्ण अक्षरांनी लिहून ठेवावा असा असल्याचा आनंद व्यक्त केला.