प्रियकराने दिला दगा, नैराश्यातून आयटी इंजिनिअर तरुणीची आत्महत्त्या!

महाराष्ट्र संवाद न्यूज ऑनलाईन, पुणे

एका उच्चशिक्षित आयटी इंजिनिअर तरुणीने मुठा नदीत उडी मारून आपली जीवनयात्रा संपवली आहे. प्रियकराने केलेल्या फसवणुकीमुळे आलेल्या नैराश्यातून तिने हे टोकाचे पाऊल उचलल्याचे समोर आले असून, या घटनेमुळे परिसरात प्रचंड खळबळ उडाली आहे.

समोर आलेल्या माहितीनुसार, मृत तरुणीचे एका चप्पल विक्रेत्यासोबत प्रेमसंबंध होते. काही महिन्यांपूर्वीच तिने आपल्या कुटुंबीयांना या नात्याबद्दल सांगून लग्नाची इच्छा व्यक्त केली होती. कुटुंबाचाही या विवाहाला होकार होता. मात्र, मे महिन्यात अचानक प्रियकराने तिला विसरून जाण्यास सांगत तिची फसवणूक केली.

प्रियकराने केवळ आपला वापर केल्याचे समजल्याने ही तरुणी तीव्र मानसिक तणावाखाली होती. भावाने तिला समजावून सांगण्याचा आणि या परिस्थितीतून बाहेर काढण्याचा प्रयत्न केला, मात्र ती प्रचंड नैराश्यात होती.

दरम्यान, मुठा नदीपात्रात या तरुणीचा मृतदेह आढळून आला. खराडी पोलिसांनी तरुणीच्या भावाला संपर्क साधल्यानंतर या आत्महत्येचा प्रकार उघडकीस आला. प्रियकराने केलेल्या विश्वासघातामुळेच बहिणीने आत्महत्या केल्याचा आरोप करत भावाने पोलिसांत फिर्याद दिली आहे. या तक्रारीवरून पोलिसांनी गुन्हा दाखल केला असून, संशयित आरोपी चप्पल विक्रेत्याची चौकशी सुरू करण्यात आली आहे.

कुटुंबीयांनी धीर देण्याचा प्रयत्न करूनही तरुणीने मृत्यूचा मार्ग निवडल्याने परिसरात हळहळ व्यक्त होत आहे. पोलीस या प्रकरणाचा पुढील सखोल तपास करत असून प्रियकराला अटक करण्यात आली आहे.