शेतकऱ्यांना सरसकट कर्जमाफी द्या; नियमित कर्जदारांना २ लाखांचे अनुदान मिळावे – माजी मंत्री बाळासाहेब थोरात

महाराष्ट्र संवाद न्यूज ऑनलाईन, संगमनेर:

राज्यात सध्या महागाई आणि बेरोजगारी मोठ्या प्रमाणावर वाढली असून, शेतकऱ्यांच्या पिकांना योग्य हमीभाव व पीकविमा मिळत नसल्याने सर्वत्र अस्थिरतेचे वातावरण आहे. अशा कठीण परिस्थितीत शेतकऱ्यांना दिलासा देणे ही सरकारची प्राथमिक जबाबदारी आहे. त्यामुळे राज्य सरकारने राज्यातील सर्व शेतकऱ्यांना सरसकट कर्जमाफी द्यावी, तसेच नियमित कर्ज फेडणाऱ्या शेतकऱ्यांना प्रोत्साहन म्हणून २ लाख रुपयांचे अनुदान द्यावे, अशी आग्रही मागणी माजी कृषिमंत्री बाळासाहेब थोरात यांनी केली आहे.

तळेगाव दिघे येथे सहकार महर्षी भाऊसाहेब थोरात सहकारी साखर कारखान्याच्यावतीने आयोजित ऊस विकास मेळाव्यात ते मुख्य मार्गदर्शक म्हणून बोलत होते. या प्रसंगी कारखान्याचे व्हा. चेअरमन पांडुरंग पाटील घुले, कॅन्सरतज्ञ डॉ. जयश्रीताई थोरात यांच्यासह परिसरातील विविध पदाधिकारी, कार्यकर्ते आणि ऊस उत्पादक शेतकरी मोठ्या संख्येने उपस्थित होते.

थोरात म्हणाले की, महाविकास आघाडी सरकारच्या काळात पहिल्याच बैठकीत शेतकऱ्यांना विनाअट दोन लाख रुपयांची कर्जमाफी देण्यात आली होती. मात्र, आताच्या काळात महागाई प्रचंड वाढल्याने सरकारने शेतकऱ्यांना कमीत कमी ७ लाख रुपयांपर्यंतची सरसकट कर्जमाफी दिली पाहिजे.

संगमनेर तालुक्यात ऊस आणि दूध व्यवसायामुळे गरीब कुटुंबांमध्ये आर्थिक समृद्धी आली असून, शेतकऱ्यांनी आता एकरी १०० टन ऊस उत्पादनाचे उद्दिष्ट ठेवून काम करावे, असे आवाहनही त्यांनी केले.

तसेच चेन्नई-सुरत ग्रीनफिल्ड महामार्गाच्या बाबतीत आपण पूर्णपणे शेतकऱ्यांच्या पाठीशी असून, बाधित शेतकऱ्यांना वाढीव मोबदला मिळालाच पाहिजे, अशी ठाम भूमिका त्यांनी यावेळी मांडली.