संगमनेरच्या बजाज शोरूममध्ये नेमकं काय घडलं? ग्राहकाच्या तक्रारीनंतर खळबळ; मॅनेजरसह १० ते १५ जणांवर गुन्हा दाखल

महाराष्ट्र संवाद न्यूज ऑनलाईन, संगमनेर:

संगमनेर शहरातील मालपाणी बजाज शोरूममध्ये दुचाकी दुरुस्तीच्या कारणावरून झालेल्या वादातून शोरूमचे मॅनेजर आणि कर्मचाऱ्यांनी मिळून एका ग्राहकाला आणि त्यांच्या ज्येष्ठ सासऱ्यांना लोखंडी रॉड, स्क्रू-ड्रायव्हर व लाथाबुक्क्यांनी बेदम मारहाण केल्याची धक्कादायक घटना समोर आली आहे.

याप्रकरणी संगमनेर शहर पोलीस ठाण्यात शोरूमचे मॅनेजर सचिन पलोड यांच्यासह १० ते १५ अनोळखी कर्मचाऱ्यांविरुद्ध भारतीय न्याय संहिता (BNS) अंतर्गत विविध कलमांनुसार गुन्हा दाखल करण्यात आला आहे.

शोरूमसारख्या सार्वजनिक आणि व्यावसायिक ठिकाणी ग्राहकाला झालेल्या या अमानुष मारहाणीमुळे परिसरात तीव्र संताप व्यक्त होत आहे. या संदर्भात स्वप्निल रोहिदास सातपुते (वय २५, रा. कासारा दुमाला, संगमनेर) यांनी पोलीस ठाण्यात फिर्याद दिली आहे. फिर्यादी स्वप्निल हे शेती व्यवसाय करतात. त्यांनी दिलेल्या तक्रारीनुसार, त्यांच्या सासऱ्यांनी सुमारे एक वर्षापूर्वी संगमनेर येथील मालपाणी बजाज शोरूममधून बजाज कंपनीची ‘चेतक’ इलेक्ट्रिक दुचाकी विकत घेतली होती. ती गाडी बंद पडल्यामुळे स्वप्निल आणि त्यांचे सासरे त्रिंबक लक्ष्मण राऊत हे दोघे शनिवारी, ३० मे रोजी सकाळी साडे नऊ वाजेच्या सुमारास सदर गाडी दुरुस्त करण्यासाठी पिकअप गाडीतून मालपाणी बजाज शोरूम येथे घेऊन आले होते.

शोरूममध्ये आल्यानंतर स्वप्निल व त्यांचे सासरे गाडी दुरुस्तीसाठी जमा करून घेऊन पावती देण्यासाठी तेथील कर्मचाऱ्यांना सांगत होते. आम्हाला घाई असून बाहेर जायचे आहे, असे त्यांनी सांगितले असता तेथील कर्मचाऱ्यांनी त्यांना अर्धा तास थांबण्यास सांगितले. अर्धा तास झाल्यानंतर स्वप्निल यांनी पुन्हा पावतीची मागणी केली. यावरून शोरूमचे मॅनेजर सचिन पलोड हे त्यांच्याशी मोठ्या आवाजात उद्धटपणे बोलू लागले. मॅनेजर चुकीच्या पद्धतीने बोलत असल्याचे पाहून स्वप्निल यांनी मोबाईलवर या सर्व प्रकाराचे शूटिंग काढण्यास सुरुवात केली.

मोबाईलवर शूटिंग काढत असल्याचा राग आल्यामुळे मॅनेजर सचिन पलोड प्रचंड संतापले. त्यांनी स्वप्निल व त्यांचे सासरे त्रिंबक राऊत यांना अश्लील शिवीगाळ करत धक्काबुक्की सुरू केली. त्याच वेळी शोरूममधील इतर १० ते १५ कर्मचारी त्या ठिकाणी धावून आले आणि त्यांनी स्वप्निल व त्यांच्या सासऱ्यांना लाथाबुक्क्यांनी मारहाण करण्यास सुरुवात केली.

या मारहाणीदरम्यान दोन कर्मचाऱ्यांनी लोखंडी रॉड आणि स्क्रू-ड्रायव्हरचा वापर करून स्वप्निल यांच्या छातीवर, हातावर, पायावर, पोटावर आणि तोंडावर गंभीर दुखापत केली. तसेच मॅनेजर सचिन पलोड यांनी स्वप्निल यांचा गळा दाबून ‘तुला मारून टाकीन’ अशी जीवे मारण्याची धमकी देखील दिली.

या गंभीर मारहाणीनंतर स्वप्निल सातपुते यांनी दिलेल्या फिर्यादीवरून पोलिसांनी रात्री उशिराने मॅनेजर सचिन पलोड, मंगेश मिसाळ, विष्णू मोहरीकर, सचिन धुमाळ, धारणकर आणि इतर १० ते १२ अनोळखी शोरूम कर्मचाऱ्यांविरुद्ध भारतीय न्याय संहिता, २०२३ च्या कलम ११८(१), ११५(२), ३५१(२), १८९(२) आणि १९० अन्वये गुन्हा दाखल केला आहे. या प्रकरणाचा पुढील तपास पोलीस कॉन्स्टेबल कानिफनाथ जाधव करत आहेत.