अमृतवाहिनी बँकेचा देश पातळीवर डंका; ‘भारतरत्न सहकारिता’सह तीन राष्ट्रीय पुरस्कारांनी सन्मानित

महाराष्ट्र संवाद न्यूज | संगमनेर:
सहकार महर्षी भाऊसाहेब थोरात अमृतवाहिनी सहकारी बँकेच्या शिरपेचात आणखी एक मानाचा तुरा रोवला गेला आहे. बँकेच्या उत्कृष्ट कामकाजाची दखल घेत उत्तर प्रदेशातील लखनऊ येथे संपन्न झालेल्या ‘भारत को-ऑपरेटिव्ह बँकिंग समिट २०२६’ मध्ये बँकेला देश पातळीवरील सर्वोच्च ‘भारतरत्न सहकारिता पुरस्कार २०२६’ ने सन्मानित करण्यात आले. या मुख्य पुरस्कारासोबतच बँकेला इतर तीन महत्त्वाचे राष्ट्रीय पुरस्कारही मिळाले आहेत.
या समिटमध्ये अमृतवाहिनी बँकेचे चेअरमन सुधाकर जोशी यांना ‘बेस्ट चेअरमन’, मुख्य कार्यकारी अधिकारी सुशील गुजराती यांना ‘बेस्ट सीईओ’ आणि बँकेने सातत्याने राखलेल्या शून्य टक्के नेट एनपीएबद्दल ‘बेस्ट एनपीए मॅनेजमेंट’चा पुरस्कार प्रदान करण्यात आला. आसाम राज्य सहकारी बँकेचे चेअरमन व आमदार विश्वजीत फुकण, भारत नेटवर्क ग्रुपचे अनुपम गुप्ता आणि आशिष श्रीवास्तव यांच्या हस्ते हे पुरस्कार देण्यात आले. बँकेचे चेअरमन सुधाकर जोशी, व्हाईस चेअरमन ॲड. नानासाहेब शिंदे, मुख्य कार्यकारी अधिकारी सुशील गुजराती आणि असिस्टंट जनरल मॅनेजर धनंजय जाधव यांनी हा बहुमान स्वीकारला.
अमृतवाहिनी बँकेने आधुनिक डिजिटल प्रणाली, अचूक कामकाज, तत्पर ग्राहक सेवा, उत्कृष्ट व्यवस्थापन आणि सुमारे १२०० कोटी रुपयांची आर्थिक उलाढाल या बळावर राष्ट्रीय स्तरावर हे यश संपादन केले आहे. चेअरमन सुधाकर जोशी यांच्या नियोजनातून बँकेची गुणवत्ता वाढली असून, मुख्य कार्यकारी अधिकारी सुशील गुजराती यांच्या कुशल प्रशासनामुळे बँकेने आर्थिक शिस्त राखली आहे.
हा पुरस्कार संपूर्ण टीमच्या सांघिक कष्टाचे आणि लोकनेते बाळासाहेब थोरात यांच्या मार्गदर्शनाचे फलित असल्याची भावना चेअरमन सुधाकर जोशी यांनी व्यक्त केली. या अभूतपूर्व यशाबद्दल माजी महसूलमंत्री लोकनेते बाळासाहेब थोरात, माजी आमदार डॉ. सुधीर तांबे, आमदार सत्यजित तांबे, डॉ. जयश्री थोरात यांच्यासह जिल्ह्यातील विविध क्षेत्रांतील मान्यवरांनी अमृतवाहिनी बँकेचे विशेष अभिनंदन केले आहे. या राष्ट्रीय सन्मानामुळे संगमनेरच्या सहकार चळवळीचा गौरव देशपातळीवर वाढला आहे.