…अन् थेट कोर्टातच झाली घोषणाबाजी!संगमनेरमधील ‘त्या’ प्रकाराने खळबळ, २० ते २५ जणांवर गुन्हा दाखल

महाराष्ट्र संवाद न्यूज | संगमनेर:

संगमनेर न्यायालय परिसरात एका अटक आरोपीच्या समर्थनार्थ बेकायदेशीर जमाव जमवून घोषणाबाजी केल्याप्रकरणी संगमनेर शहर पोलीस ठाण्यात गुन्हा दाखल करण्यात आला आहे. पोलीस काँस्टेबल चंद्रकांत विठ्ठल सदाकाळ यांनी याप्रकरणी फिर्याद दिली आहे.

मिळालेल्या माहितीनुसार, सोमवारी (८ जून) सायंकाळी साडेचार वाजेच्या सुमारास गुंजाळवाडी शिवार येथील संगमनेर न्यायालयाच्या परिसरात ही घटना घडली. फिर्यादी पोलीस अधिकारी हे एका आरोपीला न्यायालयात हजर करत असताना, तिथे उपस्थित असलेल्या काही जणांनी अटक आरोपीचे व्हिडिओ शूटिंग करण्यास सुरुवात केली. त्यानंतर त्यांनी न्यायालय परिसरातच गैरकायदेशीर घोळका तयार करून गोंधळ घातला.

इतक्यावरच न थांबता, आरोपीला न्यायालयाबाहेर आणले जात असताना या जमावाने “आयेगा तो अपना राज, सागर पगारे संगमनेर का बॉस” अशा घोषणा दिल्या. अशा प्रकारे अटक आरोपीच्या गुन्हेगारी कृत्याचे जाहीर समर्थन करत बेकायदेशीर जमाव जमवून कायदा व सुव्यवस्थेचा प्रश्न निर्माण केल्याचा आरोप त्यांच्यावर आहे.

याप्रकरणी पोलिसांनी यश सुनील धात्रक, रितेश शाम बिडवे, आनंद गांधी आणि त्यांच्यासोबत असलेल्या इतर २० ते २५ जणांविरोधात भारतीय न्याय संहिता कलम १८९, १९०, १९१ आणि १९२ अन्वये गुन्हा नोंदवला आहे.