यशोधन कार्यालयात ‘एसटी स्मार्ट कार्ड’ सुविधेचा शुभारंभ; ज्येष्ठ नागरिक व महिलांना प्रवासात मिळणार मोठी सवलत

महाराष्ट्र संवाद न्यूज | संगमनेर:

माजी मंत्री बाळासाहेब थोरात यांच्या ‘यशोधन’ या जनसंपर्क कार्यालयात नागरिकांसाठी एसटी स्मार्ट कार्ड योजनेची सुविधा अधिक प्रभावीपणे सुरू करण्यात आली आहे. योजनेच्या अधिक माहितीसाठी नागरिकांनी ८६०५३२११६७ या संपर्क क्रमांकावर संवाद साधावा, असे यशोधन कार्यालयाच्या वतीने सांगण्यात आले आहे.

राज्याचे ज्येष्ठ नेते व माजी मंत्री बाळासाहेब थोरात यांच्या मार्गदर्शनाखाली, तसेच आमदार सत्यजित तांबे, इंद्रजीत थोरात आणि डॉ. जयश्रीताई थोरात यांच्या नियोजनातून तालुक्यातील नागरिकांना सर्व शासकीय योजनांचा लाभ तातडीने मिळवून देण्यासाठी यशोधन कार्यालय सातत्याने कार्यरत असते.

या कार्यालयात मागील तीन वर्षांपासून सुरू असलेल्या स्वतंत्र कक्षाच्या माध्यमातून आजवर अनेक ज्येष्ठ नागरिकांना या सुविधेचा लाभ मिळवून देण्यात आला असून, ही प्रक्रिया यापुढेही अविरत सुरू राहणार असल्याची माहिती डॉ. नितीन भांड व संजय कोल्हे यांनी दिली आहे.

परिवहन विभागाच्या सहकार्याने राबवल्या जाणाऱ्या या योजनेअंतर्गत ७५ वर्षांवरील ज्येष्ठ नागरिकांना १०० टक्के मोफत प्रवासाची सोय आहे, तर ६५ वर्षांवरील ज्येष्ठ नागरिकांना ५० टक्के सवलतीत प्रवास करता येणार आहे. याचसोबत महिला सन्मान योजनेअंतर्गत सर्व महिला आणि विद्यार्थिनींना एसटी प्रवासाच्या तिकिटात ५० टक्के सूट देण्यात येत आहे. प्रवासाच्या सवलतींसोबतच, महाविद्यालयीन विद्यार्थिनींना स्पर्धा परीक्षांची उत्तम तयारी करता यावी यासाठी डॉ. जयश्रीताई थोरात यांच्या संकल्पनेतून यशोधन कार्यालयात स्वतंत्र ग्रंथालयही सुरू करण्यात आले असून, सध्या अनेक विद्यार्थी याचा लाभ घेत आहेत.

या कल्याणकारी योजनेचा लाभ घेऊ इच्छिणाऱ्या तालुक्यातील ज्येष्ठ नागरिक, महिला आणि विद्यार्थिनींनी स्वतः यशोधन कार्यालयातील स्वतंत्र कक्षाला भेट देणे आवश्यक आहे. अर्ज करताना नागरिकांनी आपले ओळखपत्र, मतदान कार्ड आणि मोबाईल नंबर सोबत बाळगावा, असे आवाहन करण्यात आले आहे.