अध्यात्म सांगणे सोपे, पण जगणे कठीण : नंदकुमार पोवार

महाराष्ट्र संवाद न्यूज ऑनलाईन
संगमनेर:
अध्यात्मावर बोलणे आणि त्याचा उपदेश करणे सोपे असते, मात्र त्यानुसार जीवन जगणे अत्यंत कठीण आहे. अध्यात्माला बदनाम करू नका. जसा मासा पाण्याशिवाय जगू शकत नाही, तसेच मानवाचे जीवन अध्यात्माशिवाय परिपूर्ण होऊ शकत नाही, असे प्रतिपादन ज्येष्ठ व्याख्याते तथा गगनबावड्याचे माजी सरपंच नंदकुमार पोवार यांनी केले.
स्वामी परमपूज्य गगनगिरी महाराज अखंड हरिनाम सप्ताहानिमित्त आयोजित व्याख्यानमालेत ते बोलत होते. यावेळी त्यांनी गगनगिरी महाराजांच्या तपश्चर्या, त्याग, योगसाधना आणि लोककल्याणकारी कार्याचा भावपूर्ण आढावा घेत उपस्थित भाविकांचे प्रबोधन केले.
नंदकुमार पोवार म्हणाले की, गगनगिरी महाराजांच्या सान्निध्यात येणारा प्रत्येक आत्मा पावन होतो. कृतज्ञता व्यक्त करताना कधीही कमीपणा वाटून घेऊ नये. महाराजांनी आयुष्यभर ऊन, वारा आणि पावसाची पर्वा न करता कठोर साधना केली. अन्न-पाण्याची तमा न बाळगता त्यांनी आत्मोन्नतीचा मार्ग स्वीकारला. वन्य प्राणी आणि श्वापदांप्रतीही त्यांनी अपार माया दाखवत त्यांचे संगोपन केले.
गगनगिरी महाराज हे जन्मतःच ईश्वरी अवतारातील योगी होते. त्यांनी विविध ठिकाणी कठोर तपश्चर्या करून अध्यात्माचे सामर्थ्य जगासमोर मांडले. दक्षिण भारतातील त्यांची साधना, महालक्ष्मीचे आशीर्वाद आणि ईश्वरप्राप्तीसाठी केलेली अष्टांग योगसाधना यांचा उल्लेख करत पवार यांनी महाराजांच्या अलौकिक जीवनकार्याचा गौरवपूर्ण उहापोह केला.
आजच्या काळात अनेक संधीसाधू प्रवृत्ती वाढल्या असून बुवा-बाबांचे पेव फुटले आहे. मात्र खरे संत समाजाला योग्य दिशा देणारे असतात. गगनगिरी महाराजांनी लोकांमध्ये राहूनही एकांताचा मार्ग स्वीकारत आत्मसाधना केली आणि समाजासाठी आदर्श निर्माण केला. त्यांच्या कार्याचा महिमा अजरामर राहणार असल्याचे पोवार यांनी सांगितले.
नगर जिल्ह्यात भक्तीचे बीज रोवून हरिनामाचा जागर घडविण्याचे कार्य गगनगिरी महाराजांच्या कृपेने होत आहे. हा सप्ताह सोहळा केवळ धार्मिक कार्यक्रम नसून समाजप्रबोधन आणि आध्यात्मिक उन्नतीचा ईश्वरी मेळावा असल्याचेही त्यांनी नमूद केले.
व्याख्यानानंतर राधानगरीचे जयवंत महाराज पाटील यांचे कीर्तन झाले. सकाळी ज्ञानेश्वरी पारायण, तर सायंकाळी हरिपाठाचा कार्यक्रम उत्साहात पार पडला. सप्ताह सोहळ्यास भाविकांनी मोठ्या संख्येने उपस्थित राहून अध्यात्मिक वातावरणाचा लाभ घेतला.