संगमनेरमधील फसवणूक प्रकरणातील आरोपी भाऊसाहेब कुटे यांना औरंगाबाद खंडपीठाकडून जामीन मंजूर; प्रकृती आणि ७५ लाखांची ठेव लक्षात घेऊन कोर्टाचा निर्णय

महाराष्ट्र संवाद न्यूज ऑनलाईन
छत्रपती संभाजीनगर:
संगमनेर शहर पोलीस ठाण्यात नोंदवलेल्या कोट्यवधी रुपयांच्या फसवणूक आणि ‘एमपीआयडी’ गुन्ह्यातील मुख्य आरोपी भाऊसाहेब दामोदर कुटे यांना मुंबई उच्च न्यायालयाच्या औरंगाबाद खंडपीठाने नियमित जामीन मंजूर केला आहे. न्यायमूर्ती सिद्धेश्वर एस. ठोंबरे यांच्या खंडपीठाने हा आदेश दिला.
या प्रकरणाच्या सुनावणीदरम्यान न्यायालयाने प्रामुख्याने आरोपीची गंभीर वैद्यकीय प्रकृती आणि न्यायालयीन अटींचे केलेले पालन या दोन महत्त्वाच्या बाबींवर आपले निरीक्षण नोंदवले. न्यायालयाने आपल्या निरीक्षणात स्पष्ट केले की, नाशिकच्या सिव्हिल सर्जन यांनी सादर केलेल्या वैद्यकीय अहवालानुसार आरोपी भाऊसाहेब कुटे यांची प्रकृती अत्यंत गंभीर असून ते सध्या नाशिकमधील खासगी रुग्णालयात ऑक्सिजन आणि ‘एनआयव्ही’ सपोर्टवर उपचार घेत आहेत. त्यांना सध्याच्या स्थितीत सातत्याने वैद्यकीय देखरेखीची आणि उपचारांची आवश्यकता असल्याचे अहवालावरून प्रथमदर्शनी दिसून येते.
याशिवाय, न्यायालयाने पूर्वी दिलेल्या आदेशानुसार आरोपीने विशेष न्यायालयात ७५ लाख रुपयांची रक्कम जमा करून अटींचे पूर्ण पालन केले आहे, ही बाबही न्यायालयाने निर्णय देताना विचारात घेतली. आरोपीची चिंताजनक प्रकृती आणि एकूण परिस्थिती पाहता, गुन्ह्याच्या गुणवत्तेवर कोणतेही अंतिम मत व्यक्त न करता, न्यायालयाने त्यांना आधी मिळालेला अंतरिम जामीन कायम करत नियमित जामीन मंजूर केला. या प्रकरणात अर्जदारातर्फे ॲड. मुकुल एस. कुलकर्णी यांनी तर शासनातर्फे ॲड. डी. जे. पाटील यांनी बाजू मांडली.