भोलेनाथ दुध उत्पादक संस्थेकडून जिल्हा परिषद शाळेतील विद्यार्थ्यांना शालेय साहित्याचे वाटप; वार्षिक उलाढाल ६ कोटींवर

महाराष्ट्र संवाद न्यूज ऑनलाईन
संगमनेर:
संगमनेर जवळील कासारा दुमाला येथील भोलेनाथ दुध उत्पादक सहकारी संस्थेच्या वतीने सामाजिक बांधिलकी जपत गावातील जिल्हा परिषद शाळेतील विद्यार्थ्यांना शालेय साहित्याचे वाटप करण्यात आले. शाळेतील सर्वच मुलांना स्कूल बॅग, वह्या आणि पेन यांचे वाटप करण्यात आल्यामुळे विद्यार्थ्यांचा उत्साह द्विगुणीत झाला होता. या सामाजिक उपक्रमासाठी सह्याद्री ॲग्रोव्हेटचे संचालक नितीन हासे यांचे विशेष सहकार्य लाभले.
या कार्यक्रम प्रसंगी संस्थेचे चेअरमन राजेश गुंजाळ यांनी संस्थेच्या प्रगतीचा सविस्तर आढावा सादर केला. संस्थेच्या स्थापनेला ४४ वर्षे पूर्ण झाली असून, संस्थेची वार्षिक आर्थिक उलाढाल सुमारे सहा कोटी रुपयांवर पोहोचली आहे, अशी माहिती त्यांनी दिली. तसेच संस्थेचे दैनंदिन दूध संकलन सुमारे ४५०० लिटर असल्याचे सांगून संस्था आधुनिकतेकडे वाटचाल करत असल्याचे त्यांनी नमूद केले. संस्थेने नुकतेच सोलर पॅनल बसविल्यामुळे ऊर्जा बचतीस मोठा हातभार लागला असून, विजेचा खर्च कमी झाल्याने संस्थेचा नफा वाढण्यास मदत झाली आहे.
या कार्यक्रमाला संस्थेचे चेअरमन राजेंद्र गुंजाळ, व्हाईस चेअरमन कल्पना ढोले, संचालक मंडळ, शिक्षकवृंद आणि सह्याद्री ॲग्रोव्हेटचे संचालक नितीन हासे उपस्थित होते.
संस्था प्रगतीपथावर नेण्यासाठी संचालक मंडळ व दुध उत्पादक सभासद कायम तत्पर असल्याचे संस्थेचे सचिव भानुदास वाळके यांनी नमूद केले. तसेच संस्था नेहमीच असे सामाजिक उपक्रम राबवून आपली सामाजिक बांधिलकी जपत असते, असेही ते म्हणाले.
भोलेनाथ दुध उत्पादक संस्थेने राबविलेल्या या स्तुत्य उपक्रमाबद्दल माजी महसूल मंत्री आमदार बाळासाहेब थोरात आणि संगमनेर दुध संघाचे चेअरमन रणजितसिंह देशमुख यांनी संस्थेच्या संचालक मंडळाचे विशेष अभिनंदन केले असून संस्थेच्या पुढील प्रगतीस शुभेच्छा दिल्या आहेत.