पुणे : संपूर्ण महाराष्ट्राला हादरवून सोडणाऱ्या भोर तालुक्यातील नसरापूर येथील साडेतीन वर्षांच्या चिमुरडीवरील अत्याचार आणि निर्घृण हत्या प्रकरणात अखेर आज पुण्याच्या विशेष न्यायालयाने ऐतिहासिक आणि सर्वात मोठा निकाल दिला आहे. ६५ वर्षीय नराधम दोषी भीमराव प्रभाकर कांबळे याला विशेष न्यायाधीश एस. आर. साळुंखे यांनी मरेपर्यंत फाशीची कठोर शिक्षा सुनावली आहे.
गुन्हा घडल्यापासून अवघ्या दोन महिन्यांच्या आत संपूर्ण सुनावणी पूर्ण करून निकाल देणारा हा राज्यातील आजवरचा सर्वात जलद गतीने निकाली लागलेला पहिलाच खटला ठरला आहे.
महाराष्ट्र दिनी, म्हणजेच १ मे रोजी नसरापूर येथे ही काळीमा फासणारी घटना घडली होती, ज्यानंतर अख्ख्या राज्यात तीव्र संतापाची लाट उसळली होती. पोलिसांनी प्रकरणाचे गांभीर्य ओळखून तातडीने विशेष तपास पथक स्थापन केले आणि केवळ १५ दिवसांच्या आत १,२०० पानांचे भक्कम दोषारोपपत्र न्यायालयात दाखल केले. २१ मे पासून या प्रकरणाची दैनंदिन सुनावणी सुरू झाली.
सरकारी पक्षाने अत्यंत वेगाने पीडित मुलीचे कुटुंबीय, प्रत्यक्षदर्शी साक्षीदार, वैद्यकीय तज्ज्ञ आणि डीएनए विश्लेषकांसह ५० हून अधिक साक्षीदारांची साक्ष नोंदवली. २० जून रोजी दोन्ही बाजूंचा अंतिम युक्तिवाद पूर्ण झाल्यानंतर न्यायालयाने गुरुवारीच भीमराव कांबळे याला पोक्सो आणि भारतीय दंड संहितेच्या विविध कलमांखाली दोषी ठरवले होते.
आज शिक्षेच्या तीव्रतेवर झालेल्या अंतिम सुनावणी दरम्यान विशेष सरकारी वकील अजय मिसर यांनी आरोपीला केवळ आणि केवळ फाशीचीच शिक्षा देण्याची जोरदार मागणी केली. न्यायाधीशांनी मागील सुनावणीत आरोपीला स्वतःला काय शिक्षा द्यायला हवी असे विचारले असता त्याने आधी मौन बाळगले आणि नंतर न्यायालयात खोटी कहाणी रचण्याचा प्रयत्न केला. मात्र, न्यायालयाने त्याला कडक शब्दांत फटकारले.
शिक्षा सुनावताना न्यायाधीशांनी स्पष्ट केले की, आरोपीने चिमुरडीला जिवंत राहण्याचा कुठलाच पर्याय सोडला नव्हता आणि तिच्या मृत्यूनंतरही अत्याचार सुरूच ठेवला होता. वैद्यकीय शवविच्छेदनातून हे क्रूर कृत्य सिद्ध झाले असून ६५ वर्षे वय असले तरी आरोपीमध्ये सुधारण्याची कोणतीही शक्यता नाही. ही केस ‘रेअरेस्ट ऑफ रेअर’ (दुर्मिळातील दुर्मिळ) असल्याचे नमूद करत न्यायालयाने नराधमाला फाशीची शिक्षा सुनावली, ज्यामुळे पीडित कुटुंबाला अखेर खऱ्या अर्थाने न्याय मिळाला आहे.
