आदित्य कडलग यांची जागतिक विमा परिषदेसाठी ऐतिहासिक निवड; संगमनेरच्या शिरपेचात मानाचा तुरा

महाराष्ट्र संवाद न्यूज ऑनलाईन
संगमनेर:
संगमनेरचे युवा विमा अभिकर्ता आदित्य सुनील कडलग यांची सिंगापूर येथे होणाऱ्या जागतिक विमा परिषदेसाठी निवड झाली असून, त्यांनी आंतरराष्ट्रीय स्तरावर मानाचा ‘सीओटी’ आणि ‘एमडीआरटी’ सन्मान पटकावला आहे.
टाटा एआयए लाईफ इन्शुरन्स कंपनीचे प्रतिनिधी असलेल्या आदित्य कडलग यांनी केवळ पाच महिन्यांत यंदाचे ‘एमडीआरटी’ (Million Dollar Round Table) मानांकन मिळवून आपल्या यशाचे सातत्य राखले आहे. या उल्लेखनीय कामगिरीमुळे सिंगापूर येथे २२ ते २५ ऑगस्ट २०२७ दरम्यान आयोजित होणाऱ्या जागतिक विमा परिषदेत त्यांना सहभागी होण्याचा बहुमान मिळाला आहे.
आदित्य यांनी २०२३ मध्ये विमा क्षेत्रात पदार्पण करताच पहिल्याच वर्षी एमडीआरटीचा बहुमान मिळवला होता, तर २०२४ मध्ये एकाच वर्षात सलग तीन वेळा एमडीआरटी करत जागतिक स्तरावरील अत्यंत प्रतिष्ठित ‘सीओटी’ पुरस्कार मिळवणारे ते संगमनेरमधील पहिले विमा सल्लागार ठरले आहेत.
आदित्य यांच्या या यशाचा पाया त्यांचे वडील आणि ‘कडलग इन्व्हेस्टमेंट’चे संस्थापक सुनील कडलग यांच्या ३० वर्षांच्या समृद्ध अनुभवातून रचला गेला आहे. सुनील कडलग यांनी विमा, म्युच्युअल फंड आणि आरोग्य विमा क्षेत्रात पारदर्शक सेवा देत मोठी विश्वासार्हता निर्माण केली असून, कोरोना काळात अनेक कुटुंबांना मृत्यू दावे आणि वैद्यकीय खर्चाची आर्थिक मदत मिळवून दिली आहे. सामाजिक कार्यकर्ते व वक्ते म्हणून परिचित असलेले सुनील कडलग हे जवळे कडलग येथील स्वामी विवेकानंद सार्वजनिक वाचनालय आणि रोटरी क्लबच्या माध्यमातूनही सक्रिय आहेत. वडिलांच्या याच सामाजिक व व्यावसायिक वारशाचा आदर्श घेत आदित्य कडलग यांनीही ग्राहकांना आर्थिक उद्दिष्टांपर्यंत पोहोचवण्यात यश मिळवले आहे.
या अभूतपूर्व कामगिरीबद्दल आदित्य यांना टाटा एआयए लाईफ इन्शुरन्स कंपनीचे नाशिक शाखाधिकारी सचिन कोठारी, चीफ बिझनेस असोसिएट सुरज वानखेडे आणि त्यांच्या मातोश्री उपक्रमशील शिक्षिका वृषाली कडलग यांचे मोलाचे मार्गदर्शन लाभले. संगमनेर शहराच्या नावलौकिकात जागतिक स्तरावर भर घालणाऱ्या आदित्य कडलग यांच्या या यशाबद्दल सध्या सर्वच स्तरातून त्यांच्यावर कौतुकाचा वर्षाव होत आहे.