तालुक्यातील ऐतिहासिक व स्वराज्य संकल्पभूमी पेमगिरी येथे वटसावित्री पौर्णिमेनिमित्त ‘उत्सव माझ्या कुंकवाचा’ हा अनोखा महिला सन्मान सोहळा उत्साहात पार पडला. जाकमत बाबा मित्र मंडळ, आदिशक्ती फाउंडेशन आणि शिवसेना महायुती यांच्या वतीने आयोजित या कार्यक्रमात हजारो महिलांनी ऐतिहासिक महाकाय वटवृक्षाला सात फेरे मारून पतीच्या दीर्घायुष्यासाठी प्रार्थना केली. यावेळी आमदार अमोल खताळ यांच्या पत्नी नीलम खताळ यांनीही वटवृक्षाची पूजा करून पतीच्या दीर्घायुष्यासाठी प्रार्थना केल्याचे सांगितले.
या सोहळ्यात धार्मिक परंपरेसोबतच महिला सन्मान आणि पर्यावरण संवर्धनाचा सुंदर संदेश देण्यात आला. विविध क्षेत्रांत उल्लेखनीय कार्य करणाऱ्या कर्तृत्ववान महिलांचा सन्मानचिन्ह व सन्मानपत्र देऊन गौरव करण्यात आला. आमदार खताळ यांच्या मातोश्री मंगल खताळ, पत्नी नीलम खताळ, रीलस्टार वृषाली गुंजाळ, जादूगार रिया कानवडे आणि महिला तालुकाध्यक्ष सुनीता कानवडे यांच्या हस्ते हा सन्मान सोहळा पार पडला.
पर्यावरण संरक्षणाची जनजागृती म्हणून पूजेसाठी आलेल्या प्रत्येक महिलेला पेरू, आवळा, आंबा अशा विविध फळझाडांच्या सुमारे दोन हजार रोपांचे वाटप करण्यात आले. सोहळ्यात महिलांच्या मनोरंजनासाठी सांस्कृतिक कार्यक्रमांचेही आयोजन होते.
निमगाव पागा येथील जादूगार रिया कानवडे यांच्या जादूच्या प्रयोगांनी महिलांना मंत्रमुग्ध केले, तर माधुरी गुंजाळ आणि मच्छिंद्र बिडवे यांनी सुमधुर गीते सादर केली. अर्चना वनपत्रे यांनी आभार मानलेला हा सोहळा पेमगिरी परिसरातील महिलांसाठी संस्मरणीय ठरला.
