महाराष्ट्र संवाद न्यूज ऑनलाईन अहिल्यानगर: नेवासा तालुक्यातील घोडेगाव येथील ‘कृषी गौरव फर्टिलायझर्स’वर कृषी विभागाने मोठी कारवाई करत २१ लाख ८० हजार ४८६ रुपये किमतीचा २ हजार ३४ गोण्यांचा बेकायदेशीर आणि निकृष्ट खतसाठा जप्त केला आहे. याप्रकरणी आस्थापनेचे मालक किरण चंद्रकांत दौंडकर यांच्याविरुद्ध सोनई पोलीस ठाण्यात विविध कायद्यांन्वये गुन्हा दाखल करण्यात आला असून, संबंधित दुकानाचा खत विक्री परवाना तात्काळ प्रभावाने निलंबित करण्यात आला आहे.
जिल्हा परिषदेचे कृषी विकास अधिकारी सुधीर शिंदे यांनी या कारवाईबाबत सविस्तर माहिती दिली. कृषी विभागाच्या पथकाने १५ जून २०२६ रोजी शिंगवे तुकाई येथील एमआयडीसी मधील प्लॉट क्र. बी-५६ वर असलेल्या या आस्थापनेची अचानक तपासणी केली होती. या तपासणी दरम्यान खत विक्री आणि साठवणुकीशी संबंधित कोणतीही आवश्यक कागदपत्रे अथवा नोंदवह्या पथकाला मिळून आल्या नाहीत. तसेच विविध कंपन्यांच्या नावांचा गैरवापर करून बेकायदेशीररीत्या उत्पादित केलेल्या रासायनिक खतांच्या तब्बल २ हजार ३४ गोण्या साठवून ठेवल्याचे समोर आले, जप्त करण्यात आल्या.
जप्त केलेल्या खतांचे नमुने तातडीने पुणे येथील खत नियंत्रण प्रयोगशाळेत तपासणीसाठी पाठवण्यात आले होते. नियमानुसार या अहवालासाठी ३० दिवसांचा अवधी असताना, प्रकरणाचे गांभीर्य ओळखून कृषी विभागाने अवघ्या १० दिवसांत हा अहवाल प्राप्त केला.
या प्रयोगशाळा अहवालात संबंधित खतांमधील पीएच, सेंद्रिय कर्ब आणि कार्बन-नायट्रोजनचे (सी/एन) गुणोत्तर विहित मानकांनुसार अत्यंत अयोग्य आणि निकृष्ट दर्जाचे असल्याचे निष्पन्न झाले.
शेतकऱ्यांची फसवणूक करणाऱ्या आणि निकृष्ट व बेकायदेशीर खते विकणाऱ्यांविरुद्ध कृषी विभागाची ही धडक मोहीम यापुढेही अशीच सुरू राहील आणि अशा प्रकरणांमध्ये दोषी असणाऱ्या कोणत्याही व्यक्तीला पाठीशी घातले जाणार नाही, असा इशारा कृषी विकास अधिकारी सुधीर शिंदे यांनी दिला आहे.
