महाराष्ट्र संवाद न्यूज ऑनलाईन
संगमनेर:
संगमनेर शहरात छत्रपती शिवाजी महाराज आणि भारतरत्न डॉ. बाबासाहेब आंबेडकर यांच्या स्मारकांच्या उभारणीसाठी हालचालींना वेग आला आहे. या प्रकल्पांसाठी नगराध्यक्ष डॉ. मैथिली तांबे यांनी विशेष पुढाकार घेतला असून, संगमनेर नगर परिषदेने या कामासाठी अधिकृत निविदा प्रसिद्ध केली आहे. या महत्त्वाकांक्षी प्रकल्पामुळे शहराच्या सौंदर्यात भर पडणार असून, दोन्ही महापुरुषांच्या भव्य स्मारकांचा मार्ग मोकळा झाला आहे.
नगर परिषदेने दिलेल्या माहितीनुसार, संगमनेर बस स्थानकाच्या आवारात प्रस्तावित चौथर्यावर छत्रपती शिवाजी महाराज यांचा पंधरा फूट उंचीचा अश्वारूढ पुतळा उभारला जाणार आहे. हा पुतळा ब्राँझ गनमेटल या धातूपासून बनविण्यात येणार आहे. त्याचप्रमाणे, शिवाजी चौकातील भारतरत्न डॉ. बाबासाहेब आंबेडकर यांच्या सद्यस्थितीत असलेल्या पुतळ्याच्या ठिकाणी बारा फूट उंचीचा पूर्णाकृती पुतळा उभारण्याचे नियोजन आहे. हा पुतळा देखील ब्राँझ गनमेटल धातूचाच असेल. मुख्याधिकारी दयानंद गोरे, नगराध्यक्ष डॉ. मैथिली तांबे यांनी यासंबंधीची निविदा प्रसिद्धीस दिली आहे.
नगर परिषदेने या कामांसाठी ई-निविदा प्रक्रिया सुरू केली आहे. इच्छुक आणि पात्र कंत्राटदार ‘महाटेंडर्स’च्या संकेतस्थळावरून या निविदेबाबतची अधिक माहिती घेऊ शकतात. एक जुलै २०२६ पासून निविदा प्रक्रियेला सुरुवात झाली असून, दहा जुलै २०२६ पर्यंत ऑनलाइन निविदा सादर करण्याची मुदत देण्यात आली आहे.
