या कारणासाठी संगमनेरच्या ‘हॉटेल रंगीला पंजाब’चा परवाना ३० दिवसांसाठी निलंबित; जिल्हाधिकाऱ्यांची कडक कारवाई

महाराष्ट्र संवाद न्यूज ऑनलाईन 
संगमनेर:
शासनाने घालून दिलेल्या अटी व शर्तींचे गंभीर उल्लंघन केल्याप्रकरणी संगमनेर खुर्दमधील प्रसिद्ध ‘हॉटेल रंगीला पंजाब’वर जिल्हा प्रशासनाने मोठी कारवाई केली आहे. अहिल्यानगरचे जिल्हाधिकारी डॉ. पंकज आशिया यांनी या हॉटेलचा मद्यविक्रीचा परवाना (एफएल-३ परवाना क्रमांक ११५६) ३० दिवसांसाठी निलंबित करण्याचे आदेश दिले असून, प्रशासनाने हे हॉटेल तातडीने बंद केले आहे.
राज्य उत्पादन शुल्क विभागाच्या संगमनेर-१ विभागाच्या दुय्यम निरीक्षकांच्या पथकाने या हॉटेलची अचानक आणि सविस्तर तपासणी केली होती. या तपासणीदरम्यान हॉटेलमध्ये अनेक गंभीर त्रुटी आणि बेकायदेशीर बाबी आढळून आल्या. यामध्ये प्रामुख्याने विहित नमुन्यातील मद्यविक्रीच्या नोंदवह्या वेळेवर अद्ययावत न ठेवणे, हॉटेलमध्ये काम करणाऱ्या नोकरांचे अधिकृत नोकरनामे व माहिती प्रशासनाकडे सादर न करणे, तसेच प्रशासनाने ठरवून दिलेल्या विहित वेळेनंतरही म्हणजेच रात्री पावणे बारा वाजेपर्यंत (२३.४५) हॉटेल सुरू ठेवणे अशा नियमांचे उल्लंघन होत असल्याचे समोर आले.
याशिवाय, सर्वात गंभीर बाब म्हणजे हॉटेलचा मंजूर नकाशा सादर न करता, अधिकृत परवानाधारक क्षेत्राच्या बाहेर असलेल्या लॉन्सवर छुप्या पद्धतीने ग्राहकांना मद्यविक्री करणे आणि विनापरवाना ग्राहकांना दारू पिण्याची सोय उपलब्ध करून देणे, असे प्रकार या तपासणीत निष्पन्न झाले होते.
या सर्व अनियमिततेबाबत राज्य उत्पादन शुल्क विभागाने हॉटेलचे चालक व मालक विकास शिवाजी खुळे यांच्याकडे चौकशी केली होती. याप्रकरणी जिल्हाधिकाऱ्यांनी संबंधित हॉटेल चालकाला ‘कारणे दाखवा’ नोटीस बजावून त्यांचा खुलासा मागवला होता, तसेच जिल्हाधिकारी कार्यालयाच्या दालनात या प्रकरणी रीतसर सुनावणीही घेण्यात आली. मात्र, हॉटेल चालकाने सादर केलेला खुलासा अत्यंत असमाधानकारक, तथ्यहीन आणि केवळ प्रशासकीय त्रुटींवर पांघरूण घालणारा असल्याचा निष्कर्ष जिल्हा प्रशासनाने काढला.
मुंबई विदेशी दारू नियम १९५३ आणि महाराष्ट्र मद्य निषेध कायदा १९४९ मधील विविध कलमे व अटींचे थेट उल्लंघन सिद्ध झाल्याने, जिल्हाधिकारी डॉ. पंकज आशिया यांनी हॉटेल रंगीला पंजाबचा व्यवसाय आणि मद्यविक्रीचे सर्व व्यवहार पुढील ३० दिवसांसाठी तात्काळ प्रभावाने निलंबित करण्याचे आदेश दिले. या कारवाईमुळे संगमनेर परिसरातील हॉटेल व्यावसायिकांमध्ये मोठी खळबळ उडाली आहे.