दोन फुटांवर मृत्यूचा थरार! आश्वी खुर्द येथे क्षिरसागर दाम्पत्य थोडक्यात बचावले; दोन विभागांच्या ढकलाढकलीत नागरिकांचा जीव टांगणीला

महाराष्ट्र संवाद न्यूज ऑनलाईन
आश्वी:
पावसाळा सुरू होताच आश्वी खुर्द आणि परिसरात महावितरणच्या गलथान कारभाराचे दर्शन घडू लागले असून, रविवारी सकाळी एका शेतकरी दाम्पत्याला मृत्यूचा थरारक अनुभव आला.
आश्वी खुर्द येथील प्रगतशील शेतकरी रामनाथ क्षिरसागर (वय ४४) आणि त्यांच्या पत्नी योगिता क्षिरसागर (वय ३८) हे सकाळी नऊ वाजेच्या सुमारास आपल्या गायींसाठी चारा कापत असताना, त्यांच्या अवघ्या दोन फुटांवर ११ केव्हीची उच्चदाब वीजवाहिनी अचानक तुटून कोसळली. सुदैवाने या तारेला रबराचे आवरण असल्याने आणि दाम्पत्य काही अंतरावर असल्याने एक मोठा अनर्थ टळला. मुख्य वीजवाहिनी जमिनीवर पडताना मोठा स्फोट झाला आणि हवेत ठिणग्या उडाल्याने काही काळ परिसरात भीतीचे वातावरण निर्माण झाले होते. या घटनेमुळे नऊ वर्षांपूर्वी याच परिसरात वीजवाहिनी अंगावर पडल्याने मृत्यू पावलेले शेतकरी रमेश लहानू शिंदे यांच्या दुर्दैवी अपघाताची आठवण पुन्हा ताजी झाली आहे.
ही घटना जगुमाई–पाचमोऱ्या ओढा परिसरात, प्रवरा उजव्या कालव्यालगत असलेल्या क्षिरसागर यांच्या शेताजवळ घडली. घटना घडल्यानंतर रामनाथ क्षिरसागर यांनी तातडीने वीज वितरण कंपनीच्या कर्मचाऱ्यांशी संपर्क साधला. त्यानंतर हर्षल गडगे, गणेश गायकवाड आणि तान्हाजी सांगळे यांनी घटनास्थळी धाव घेत झाडांच्या फांद्या तोडून वीजपुरवठा पूर्ववत केला. मात्र, आश्वी खुर्द उपकेंद्रातून हंगेवाडी व शेडगावकडे जाणाऱ्या मुख्य वीजवाहिन्यांवर मोठमोठ्या झाडांच्या फांद्या लोबंकळत असल्याने हा धोका कायम आहे.
वारा आणि पाऊस सुरू झाला की या फांद्या तारांवर घासून शॉर्ट सर्किट होते किंवा तारा तुटतात. याच मार्गावरून रोज शेतकरी, दूध उत्पादक आणि शालेय विद्यार्थी ये-जा करत असल्याने भविष्यात मोठ्या जीवितहानीची शक्यता वर्तवली जात आहे.
या गंभीर समस्येबाबत ग्रामस्थांनी अनेकदा तक्रारी केल्या आहेत, परंतु महावितरण आणि पाटबंधारे विभाग यांच्यातील अंतर्गत वादामुळे हा प्रश्न प्रलंबित आहे. महावितरण सदर झाडे पाटबंधारे विभागाच्या जागेत असल्याचे सांगून जबाबदारी झटकते, तर पाटबंधारे विभाग वीजवाहिन्यांची सुरक्षा ही महावितरणचे काम असल्याचे सांगते. या दोन्ही विभागांच्या ढकलाढकलीत सर्वसामान्य नागरिकांच्या आणि विद्यार्थ्यांच्या जीवाशी खेळ सुरू असल्याचा संताप व्यक्त होत आहे. या समस्येवर कायमस्वरूपी तोडगा काढण्यासाठी आता ग्रामस्थ थेट राज्याचे जलसंपदा मंत्री राधाकृष्ण विखे पाटील यांची भेट घेणार असून, प्रशासनाने वेळीच लक्ष न दिल्यास तीव्र आंदोलनाचा इशारा देण्यात आला आहे.
घटनेनंतर तातडीने कर्मचारी पाठवून वीजपुरवठा सुरळीत करण्यात आला. मात्र, वीजवाहिन्यांना अडथळा ठरणारी झाडे पूर्णपणे हटविण्यासाठी पाटबंधारे विभागाची अधिकृत परवानगी आवश्यक आहे. — अक्षय विखे (अभियंता, वीज वितरण कंपनी, आश्वी)
या धोकादायक झाडांबाबत अनेक वेळा लेखी व तोंडी मागणी करूनही प्रशासन दखल घेत नाही. भविष्यात जर एखादी मोठी दुर्घटना घडली, तर त्याला महावितरण आणि पाटबंधारे हे दोन्ही विभाग जबाबदार राहतील. प्रशासनाने नागरिकांच्या संयमाचा अंत न पाहता त्वरित कारवाई करावी, अन्यथा तीव्र आंदोलन छेडण्यात येईल. — सतीश गायकवाड (सामाजिक कार्यकर्ते, आश्वी खुर्द)
नऊ वर्षांपूर्वी याच निष्काळजीपणामुळे एका निष्पाप शेतकऱ्याचा बळी गेला होता. आता क्षिरसागर दाम्पत्य थोडक्यात बचावले आहे. प्रशासन आणखी किती लोकांचा जीव जाण्याची वाट पाहत आहे? हा निष्पाप लोकांच्या जिवाशी चाललेला खेळ थांबला पाहिजे. — कैलास गायकवाड (सामाजिक कार्यकर्ते, आश्वी खुर्द)