संगमनेर पालिकेची सर्वसाधारण सभा ‘लाईव्ह’ करण्याची गुड्डू इंजिनियर यांची मागणी!
या महत्त्वपूर्ण मागणीवर संगमनेर नगरपरिषद प्रशासन आणि मुख्याधिकारी दयानंद गोरे नेमकी काय भूमिका घेतात, याकडे संपूर्ण संगमनेर शहराचे आणि सुज्ञ नागरिकांचे लक्ष लागले आहे.
महाराष्ट्र संवाद न्यूज ऑनलाईन संगमनेर: संगमनेर नगरपरिषदेच्या सर्वसाधारण सभेचे थेट प्रक्षेपण करण्यात यावे, अशी आग्रही मागणी सामाजिक कार्यकर्ते मुजम्मील शेख (गुड्डू इंजिनिअर) यांनी मुख्याधिकारी दयानंद गोरे यांच्याकडे एका निवेदनाद्वारे केली आहे.
आजच्या आधुनिक आणि डिजिटल युगात प्रशासकीय कारभारात पूर्ण पारदर्शकता आणण्यासाठी हे हायटेक पाऊल उचलणे अत्यंत गरजेचे असल्याचे मुजम्मील शेख यांनी या निवेदनात म्हटले आहे. या मागणीच्या पूर्ततेकडे आता संगमनेरकरांचे लक्ष याकडे लागले आहे.
नगरपरिषदेच्या सर्वसाधारण सभेमध्ये शहराच्या विकासाचे महत्त्वाचे निर्णय, विविध विकासकामे, आर्थिक बाबी आणि नागरिकांच्या मूलभूत समस्यांवर खडाजंगी चर्चा होत असते. अशा वेळी सभागृहात आपण निवडून दिलेले लोकप्रतिनिधी नक्की काय भूमिका मांडतात, हे प्रत्येक नागरिकाला घरबसल्या कळावे यासाठी सभेचे फेसबुक, यूट्यूब किंवा इतर अधिकृत सोशल मीडिया माध्यमांवर थेट प्रक्षेपण करावे, अशी मागणी त्यांनी केली आहे.
सभेचे थेट प्रक्षेपण सुरू झाल्यास निवडून आलेले नगरसेवक सभागृहात काय काम करतात, तसेच पालिकेचे इंजिनिअर्स आणि कंत्राटदार विकासकामांचा दर्जा कसा राखतात, या सर्वांचा लेखाजोखा थेट जनतेसमोर येणार आहे. बैठकांमधील अंतर्गत निर्णय आणि निधीचे वाटप उघड होणार असल्याने चुकीच्या कामांना पायबंद बसेल आणि लोकप्रतिनिधींच्या वक्तव्यात तसेच वर्तनात कमालीची पारदर्शकता येईल, असा विश्वास मुजम्मील शेख यांनी व्यक्त केला आहे.
नागरिकांच्या हिताचा आणि सुशासनाचा विचार करून मुख्याधिकार्यांनी पुढील प्रत्येक सभेचे थेट प्रक्षेपण करण्याची तातडीने अंमलबजावणी करावी, अशी मागणी या निवेदनात करण्यात आली आहे. मुजम्मील शेख यांनी या निवेदनाच्या प्रती आमदार अमोल खताळ पाटील, पालकमंत्री राधाकृष्ण विखे पाटील आणि नगराध्यक्षा मैथिली तांबे यांच्याकडेही माहितीसाठी व योग्य त्या कार्यवाहीसाठी पाठवल्या आहेत. आता या महत्त्वपूर्ण मागणीवर संगमनेर नगरपरिषद प्रशासन आणि मुख्याधिकारी दयानंद गोरे नेमकी काय भूमिका घेतात, याकडे संपूर्ण संगमनेर शहराचे आणि सुज्ञ नागरिकांचे लक्ष लागले आहे.
