महाराष्ट्र संवाद न्यूज ऑनलाईन संगमनेर:
संगमनेर आणि परिसरातील हजारो कामगार बांधवांसाठी एक आनंदाची आणि दिलासादायक बातमी आहे. अनेक वर्षांपासून प्रलंबित असलेले कामगार रुग्णालयाचे स्वप्न आता प्रत्यक्षात साकार होत असून, आमदार अमोल खताळ यांच्या सातत्यपूर्ण आणि प्रभावी पाठपुराव्यामुळे या रुग्णालयाचे काम अंतिम टप्प्यात आले आहे. शहरातील मुख्य ठिकाण असलेल्या जाणता राजा मार्गावरील, स्टेट बँकेसमोरील इमारतीमध्ये हे रुग्णालय उभारण्यात येत असून, लवकरच ते सर्वसामान्य नागरिकांच्या आणि कामगारांच्या सेवेत दाखल होणार आहे.
आजवर कर्मचारी राज्य विमा योजनेअंतर्गत येणाऱ्या संगमनेरमधील हजारो कामगारांना किरकोळ तसेच गंभीर आजारांवरील उपचारांसाठी नाशिक किंवा अहिल्यानगर येथील रुग्णालयांवर अवलंबून राहावे लागत होते. या लांबच्या प्रवासामुळे कामगारांचा मोठा वेळ आणि पैसा वाया जात होता, तसेच रुग्णांसह त्यांच्या कुटुंबाला प्रचंड मानसिक व शारीरिक त्रासाला सामोरे जावे लागत होते. मात्र आता हक्काचे कामगार रुग्णालय थेट संगमनेरमध्येच सुरू होत असल्याने कामगारांची या त्रासातून कायमची सुटका होणार आहे.
या नव्या रुग्णालयामध्ये सर्वसामान्यांना दर्जेदार आरोग्यसेवा, तज्ज्ञ डॉक्टरांचे थेट मार्गदर्शन आणि आधुनिक वैद्यकीय सुविधा एकाच छताखाली उपलब्ध करून दिल्या जाणार आहेत. हे रुग्णालय केवळ एक वास्तू नसून परिसरातील कामगार वर्गाच्या आरोग्य सुरक्षेची आणि सन्मानाची मोठी हमी ठरणार आहे. अनेक वर्षांची ही हक्काची मागणी अखेर पूर्णत्वास जात असल्याने संगमनेर तालुक्यातील कामगार, विविध कामगार संघटना आणि सर्वसामान्य नागरिकांमधून या कामाचे कौतुक होत आहे.
