‘दुर्गाताई, आता आत्मपरीक्षणाची गरज; लाभार्थ्यांना बाजूला करा!, ताईंवर चिखलफेक होत असताना काँग्रेसचे २८ नगरसेवक गप्प का? – शिवसेनेचे अमर कतारी यांचा महाविकास आघाडीला घरचा आहेर

महाराष्ट्र संवाद न्यूज ऑनलाईन
संगमनेर:
संगमनेरमध्ये सोशल मीडियावर व्हायरल होत असलेल्या व्हिडिओ क्लिपवरून राजकीय वातावरण कमालीचे तापले असून, यात आता महाविकास आघाडीतील अंतर्गत धुसफूस आणि नाराजी उघडपणे समोर आली आहे. माजी नगराध्यक्ष दुर्गाताई तांबे यांच्याकडून बोलताना अनावधानाने झालेल्या एका किरकोळ भाषिक चुकीचे विरोधकांकडून मोठ्या प्रमाणावर राजकीय भांडवल केले जात आहे. या पार्श्वभूमीवर, शिवसेना (उद्धव बाळासाहेब ठाकरे) पक्षाचे संगमनेर उपजिल्हाप्रमुख अमर कतारी यांनी एका व्हिडिओ संदेशाद्वारे आपली आक्रमक भूमिका मांडत, ज्येष्ठ महिला नेत्यावर चिखलफेक होत असतानाही काँग्रेसचे नगरसेवक आणि पदाधिकारी गप्प का, असा जळजळीत सवाल उपस्थित केला आहे.
या संपूर्ण प्रकरणाविषयी कतारी यांनी विरोधकांच्या बेछूट आरोपांचा तीव्र शब्दांत निषेध केला. ते म्हणाले की, बोलताना दुर्गाताई तांबे यांच्याकडून अनावधानाने ‘पवित्र-अपवित्र’ असा शब्दप्रयोग झाला होता. मात्र, त्यांनी तात्काळ आपली चूक सुधारून त्याबाबत अत्यंत स्पष्ट शब्दांत खुलासा केला होता. असे असतानाही, संगमनेरमधील काही स्वयंघोषित कार्यकर्ते आणि विरोधक या मुद्द्यावरून त्यांच्यावर बेलगाम आरोप करून त्यांचा अवमान करण्याचा प्रयत्न करत आहेत. सत्ताधारी आणि विरोधक यांच्यात अशा प्रकारची चिखलफेक आणि राजकारण चालतच असते, त्यामुळे विद्यमान आमदार अमोल खताळ आणि त्यांचे कार्यकर्ते काय बोलतात याच्याशी आपल्याला विशेष देणे नाही, कारण ते त्यांचे राजकीय काम करत आहेत.
परंतु, या संपूर्ण वादात सर्वात मोठी खंत आणि दुर्दैवी बाब ही आहे की, दुर्गाताई तांबे यांनी तब्बल १५ वर्षे संगमनेरचे नगराध्यक्षपद भूषवून शहरात मोठे विकासात्मक कार्य केले आहे. त्यांनी अनेक कार्यकर्ते आणि नगरसेवक घडवले. अशा एका ज्येष्ठ आणि आदरणीय महिला नेत्यावर जेव्हा विरोधकांकडून अत्यंत हीन पातळीवर जाऊन टीका केली जात आहे, तेव्हा त्यांच्या समर्थनार्थ किंवा त्यांची बाजू खंबीरपणे मांडण्यासाठी काँग्रेसचा एकही नगरसेवक रस्त्यावर उतरला नाही, तसेच सोशल मीडियावरही कोणी साधी प्रतिक्रिया देण्याची हिंमत दाखवली नाही, ही अत्यंत कृतघ्न आणि क्लेशदायक बाब आहे.
कतारी यांनी संगमनेरमधील महाविकास आघाडीच्या अंतर्गत समन्वयावर आणि कार्यपद्धतीवर जाहीरपणे तीव्र नाराजी व्यक्त केली. आगामी नगरपालिका निवडणुका डोळ्यासमोर ठेवून आपण सर्वजण महाविकास आघाडी म्हणून एकत्रितपणे सामोरे गेलो आहोत. माजी मंत्री बाळासाहेब थोरात, युवा नेते आमदार सत्यजित तांबे आणि माजी नगराध्यक्ष दुर्गाताई तांबे यांच्या नेतृत्वाखाली काँग्रेसचे २७ ते २८ नगरसेवक निवडून आले आहेत.
मात्र, असे असूनही महाविकास आघाडीचा प्रमुख घटक पक्ष असलेल्या शिवसेनेला किंवा इतर मित्रपक्षांना संगमनेर नगरपालिकेत वा कोणत्याही शासकीय अथवा राजकीय कार्यक्रमात कधीही सन्मानाने समाविष्ट करून घेतले जात नाही. आम्हाला नेहमीच जाणीवपूर्वक बाजूला ठेवले गेल्यामुळे आमच्यावरही काही राजकीय मर्यादा आणि बंधने येतात, अशी स्पष्ट कबुली त्यांनी दिली. काँग्रेसची महिला आघाडी आणि स्थानिक नगरसेवक यांच्यात आपल्याच ज्येष्ठ नेत्याची बाजू घेण्याचे धारिष्ट्य का नाही, अशी विचारणा त्यांनी केली.
कतारी यांनी तांबे आणि थोरात गटाच्या निष्ठावंत कार्यकर्त्यांसह थेट नेतृत्वालाच एक अत्यंत महत्त्वाचा आणि सल्ला दिला आहे. ते म्हणाले की, आता राजकारणात केवळ शांत बसण्याचे आणि सोशिकपणा दाखवण्याचे दिवस पूर्णपणे संपले आहेत. आजचा जमाना हा अत्यंत वेगवान आणि आक्रमक असून, समोरच्या व्यक्तीने जर बिनबुडाचे आरोप केले, तर त्याला जशास तसे चोख उत्तर दिल्याशिवाय तो शांत होत नाही. त्यामुळे कार्यकर्त्यांनी आता ‘आरेला कारे’ करायला शिकले पाहिजे. एखादा माणूस आपल्यावर चिखलफेक करतोय आणि आपण गप्प राहिलो तर तो स्वतःहून थांबेल, हा जुना काळ आता इतिहासजमा झाला आहे.
शेवटी, दुर्गाताई तांबे यांना अत्यंत आदरपूर्वक आणि महत्त्वाचा सल्ला देताना कतारी म्हणाले की, ताई, तुम्ही संगमनेरमध्ये खरोखरच कौतुकास्पद काम केले आहे, त्याला आमचा सलाम आहे; परंतु आज तुमच्या संकटकाळात तुमची बाजू घेणारा एकही खंबीर कार्यकर्ता दिसत नाही, यावरून तुम्हाला आता आत्मपरीक्षण करण्याची खरी गरज निर्माण झाली आहे. तुम्ही आजवर राजकारणात अनेक ‘लाभार्थी’ आणि ‘बगलबच्चे’ तयार केले. मात्र, जेव्हा तुमच्यावर राजकीय संकट आले, तेव्हा हे सर्व लाभार्थी नामानिराळे होऊन बाजूला झाले आहेत.
त्यामुळे इथून पुढे जर यशस्वी आणि टिकणारे राजकारण करायचे असेल, तर अशा संधीसाधू लाभार्थ्यांना तात्काळ दूर सारून, सुख-दुःखात सोबत राहणारे हक्काचे आणि प्रामाणिक कार्यकर्ते मोठे केले पाहिजेत, तरच अशा राजकीय संघर्षात आपल्याला मोठे यश मिळू शकते, असा विश्वास दिला.