युरियाचा बफर स्टॉक तातडीने खुला करा, अन्यथा तीव्र आंदोलन; संगमनेर तालुका काँग्रेसचा प्रशासनाला इशारा

महाराष्ट्र संवाद न्यूज ऑनलाईन
संगमनेर :
सध्या खरीप हंगामाने वेग घेतला असून तालुक्यातील शेतकऱ्यांना बाजरी, मका, सोयाबीन यांसारख्या पिकांसाठी युरिया खताची अत्यंत आवश्यकता आहे. मात्र, बाजारात युरियाचा तीव्र तुटवडा निर्माण झाल्याने शेतकरी अडचणीत सापडला आहे. या पार्श्वभूमीवर, शासनाच्या ताब्यातील युरियाचा बफर स्टॉक तातडीने शेतकऱ्यांसाठी खुला करावा, अशी आग्रही मागणी संगमनेर तालुका काँग्रेसच्या वतीने करण्यात आली आहे. या संदर्भात उपविभागीय कृषी अधिकाऱ्यांना एका शिष्टमंडळाद्वारे निवेदन देण्यात आले.
यावेळी तालुका काँग्रेसचे अध्यक्ष अजय फटांगरे, सहकार महर्षी थोरात कारखान्याचे संचालक विजय राहणे, सचिन दिघे, सरपंच नवनाथ कातोरे, संदीप गुंजाळ, अमोल गुंजाळ, शुभम गुंजाळ, योगेश गव्हाणे, अरुण गुंजाळ, सागर वामन, नामदेव शिंदे, सुनील लांडगे, बाबासाहेब आभाळे, सचिन गुंजाळ, नानासाहेब ढगे, भाऊसाहेब बालवडे, लक्ष्मण गुंजाळ, अनिल लांडगे, सुदर्शन गुंजाळ, संगम लांडगे आणि सचिन लांडगे यांच्यासह तालुक्यातील अनेक शेतकरी मोठ्या संख्येने उपस्थित होते.
प्रशासनाला दिलेल्या निवेदनात काँग्रेसने नमूद केले आहे की, तालुक्यातील खतांचा तुटवडा हा कृत्रिम नसून प्रत्यक्षात विक्रेत्यांकडे युरियाचा साठाच उपलब्ध नाही. असे असतानाही, तालुक्यात युरिया मुबलक प्रमाणात उपलब्ध असल्याची चुकीची माहिती देऊन प्रशासनाकडून शेतकऱ्यांमध्ये संभ्रम निर्माण केला जात आहे. या चुकीच्या माहितीमुळे भविष्यात कृषी विभागाविरोधात शेतकऱ्यांमध्ये तीव्र असंतोष निर्माण होण्याची शक्यता आहे. खरीप हंगामातील पिके वाचवण्यासाठी व शेतकऱ्यांचे होणारे मोठे नुकसान टाळण्यासाठी शासनाने राखीव ठेवलेला बफर स्टॉक त्वरित बाजारात आणणे गरजेचे आहे.
तालुकाध्यक्ष अजय फटांगरे यांनी सत्ताधाऱ्यांवर व प्रशासनावर निशाणा साधला. ते म्हणाले की, यापूर्वी जेव्हा जेव्हा खतांचा तुटवडा जाणवला, तेव्हा लोकनेते बाळासाहेब थोरात यांनी तातडीने शासनाच्या विविध विभागांशी समन्वय साधून बफर स्टॉक खुला केला होता आणि शेतकऱ्यांना वेळेत खत मिळवून दिले होते. मात्र, सध्याचे प्रशासन आपले अपयश लपवण्यासाठी केवळ चुकीच्या बातम्या पसरवत आहे.
तर काँग्रेसचे नेते सचिन दिघे यांनी इशारा दिला की, संगमनेर हा कष्टकरी आणि शेतकऱ्यांचा तालुका आहे. त्यामुळे प्रशासनाने शेतकऱ्यांच्या संयमाचा अंत न पाहता तातडीने युरियाचा बफर स्टॉक खुला करावा, अन्यथा काँग्रेस पक्षाच्या वतीने शेतकऱ्यांच्या हितासाठी तीव्र आंदोलन छेडले जाईल. निवेदन सादर करताना विजय राहणे, नवनाथ कातोरे, संदीप गुंजाळ, योगेश गव्हाणे यांच्यासह इतर पदाधिकाऱ्यांनीही शेतकऱ्यांच्या विविध समस्या मांडल्या. काँग्रेसच्या या आक्रमक भूमिकेमुळे आता प्रशासनाकडून शेतकऱ्यांना लवकरच युरिया उपलब्ध करून दिला जाईल, अशी आशा तालुक्यातील बळीराजाला लागली आहे.