समरवीर देशमुखची राज्यस्तरीय कौशल्य चाचणीत चमकदार कामगिरी; बालेवाडीच्या क्रीडा प्रबोधिनीत मिळवला प्रवेश

महाराष्ट्र संवाद न्यूज ऑनलाईन 

संगमनेर:

मालपाणी हेल्थ क्लबचा युवा जलतरणपटू समरवीर देशमुख याने जलतरणातील राज्यस्तरीय कौशल्य चाचणीत चमकदार कामगिरी करत संगमनेरच्या शिरपेचात मानाचा तुरा रोवला आहे. या घवघवीत यशामुळे त्याला पुण्यातील बालेवाडी येथील ‘श्री शिवछत्रपती क्रीडा संकुल क्रीडा प्रबोधिनी’मध्ये थेट इयत्ता आठवीच्या वर्गात सन्मानपूर्वक प्रवेश मिळाला आहे. समरवीरने आपल्या गुणवत्तेच्या बळावर मिळविलेल्या या यशाबद्दल सर्व स्तरांतून त्याचे कौतुक होत आहे.

समरवीरच्या मातोश्री रेश्मा देशमुख यांनी दिलेल्या माहितीनुसार, समरवीर मागील पाच वर्षांपासून मालपाणी हेल्थ क्लबमध्ये राष्ट्रीय जलतरणपटू व प्रशिक्षक अ‍ॅड. सदाशिवराव थोरात यांच्या मार्गदर्शनाखाली जलतरणाचा खडतर सराव करत आहे. तसेच त्याच्या शारीरिक तंदुरुस्तीसाठी हेल्थ क्लबचे प्रशिक्षक सचिन क्षीरसागर यांनीही त्याला विशेष परिश्रमपूर्वक तयार केले आहे.

१४ वर्षांखालील जिल्हा व राज्यस्तरीय कौशल्य चाचणीत समरवीरने उत्तम गुणांसह यश संपादन केल्याने त्याची या शासकीय प्रबोधिनीत निवड झाली. महाराष्ट्रातून आंतरराष्ट्रीय व ऑलिंपिक दर्जाचे खेळाडू घडवण्याच्या उद्देशाने स्थापन झालेल्या या प्रबोधिनीत समरवीरला आता इयत्ता आठवी ते बारावीपर्यंतचे शिक्षण, शास्त्रोक्त क्रीडा प्रशिक्षण, संतुलित आहार आणि अद्ययावत सुविधा मोफत मिळणार आहेत.

अहिल्यानगर जिल्ह्यातील अकोले तालुक्यातील विरगाव येथील स्वर्गीय मेजर शंकरराव थोरात यांचा पणतू असलेल्या समरवीरच्या या अभिमानास्पद कामगिरीवर मालपाणी उद्योग समूहाचे चेअरमन राजेश मालपाणी यांनी आनंद व्यक्त केला आहे. संगमनेर तालुका आणि अहिल्यानगर जिल्ह्यासाठी भूषणावह ठरलेल्या या यशात मालपाणी हेल्थ क्लबचे योगदान असल्याचा सार्थ अभिमान त्यांनी व्यक्त केला. राजेश मालपाणी यांच्यासह हेल्थ क्लबचे सभासद, व्यवस्थापक, प्रशिक्षक आणि संगमनेरमधील क्रीडाप्रेमींनी समरवीरचे हार्दिक अभिनंदन करून त्याच्या भावी ऑलिंपिक वाटचालीस शुभेच्छा दिल्या आहेत.