महाराष्ट्र संवाद न्यूज ऑनलाईन
संगमनेर:
संगमनेर शहरात अवैध गांजाची विक्री करण्याच्या उद्देशाने तो जवळ बाळगणाऱ्या तीन जणांवर संगमनेर शहर पोलीस ठाण्यात अंमली पदार्थ विरोधी कायद्यानुसार गुन्हा दाखल करण्यात आला आहे. या कारवाईत पोलिसांनी ४ किलो १३० ग्रॅम सुका गांजा, एक दुचाकी, आयफोन आणि इतर साहित्यासह एकूण २,३४,२५० रुपयांचा मुद्देमाल जप्त केला आहे.
शहर पोलिसांनी रविवारी (२ ऑगस्ट) मध्यरात्री ही कारवाई केली असून तीनही आरोपींना अटक करण्यात आली आहे. संगमनेर शहरातील जनता नगर भागात असलेल्या एका घरात आरोपी गांजा बाळगून असल्याची गुप्त माहिती मिळाल्यानंतर ही कारवाई करण्यात आली. या प्रकरणी स्थानिक गुन्हे शाखेचे पोलीस कॉन्स्टेबल बाळासाहेब अशोक गुंजाळ यांनी तक्रार दिली आहे.
या प्रकरणात संजय उर्फ संदीप राजू मालुंजकर (वय २६, रा. जनता नगर, संगमनेर), आकाश विजय क्षीरसागर (वय २९, हल्ली रा. लक्ष्मीनगर, मूळ रा. जोर्वे, संगमनेर) आणि प्रवीण सखाराम पाचकर (वय २८, हल्ली रा. जनतानगर, मूळ रा. जाखुरी, संगमनेर) या तीन आरोपींवर गुन्हा नोंदवण्यात आला आहे.
पोलिसांनी घटनास्थळावरून १,०३,२५० रुपये किमतीचा ४,१३० ग्रॅम सुका गांजा, ८० हजार रुपये किमतीची टीव्हीएस ज्युपिटर दुचाकी (एमएच १७ डीके ५१२९), ५० हजार रुपये किमतीचा आयफोन १४, १ हजार रुपये किमतीचा सॅमसंग कीपॅड मोबाईल तसेच पॅकिंगसाठी लागणाऱ्या प्लॅस्टिक पिशव्या, चिकट टेप व स्टेप्लर असा मुद्देमाल ताब्यात घेतला आहे.
पोलीस निरीक्षक समीर बारवकर यांच्या मार्गदर्शनाखाली पोलीस उपनिरीक्षक इम्रान खान हे या गुन्ह्याचा पुढील तपास करत आहेत.
