संगमनेरमधील एका दुकानावर धाड टाकून औषध प्रशासन आणि शहर पोलिसांनी मानवी आरोग्यास अत्यंत घातक असणाऱ्या १२ हजार ९०० रुपयांच्या बेकायदेशीर पाकिस्तानी ‘गोरी ब्युटी क्रीम’चा साठा जप्त केला आहे.
पोलीस निरीक्षक समीर बारवकर यांना मिळालेल्या माहितीवरून संगमनेर शहर पोलिसांनी अहिल्यानगरचे औषध निरीक्षक सोमनाथ मुळे आणि राहुल पांडे यांच्या मदतीने ही कारवाई केली. पोलीस उपनिरीक्षक श्रीकांत सावंत, विजय खुळे बाबासाहेब सातपुते विजय आगलावे सागर नागरे यांचा या पथकात समावेश होता.
याप्रकरणी मोगलपुरा, शिकलकर लाईन येथील रहिवासी दुकानदार शाहिद रियाज शेख (वय ३६) याला पोलिसांनी ताब्यात घेतले आहे.
दुकानाची पाहणी केली असता तेथे ‘मेड इन पाकिस्तान’ व ‘पाकिस्तान स्टँडर्ड’ असा स्पष्ट उल्लेख असणाऱ्या ‘गोरी ब्युटी क्रीम’ आणि ‘गोरी डे अँड नाईट क्रीम’चे तब्बल २२ बॉक्स आढळून आले. भारतात आयात व विक्रीसाठी कोणतीही वैध परवानगी नसताना हे घातक सौंदर्यप्रसाधन ग्राहकांना सर्रास विकले जात असल्याचे तपासात समोर आले आहे.
या प्रकरणी राहुल कैलास पांडे यांच्या फिर्यादीवरून संगमनेर शहर पोलीस ठाण्यात औषधी व सौंदर्यप्रसाधने अधिनियम १९४०, परदेशी व्यापार विकास व नियमन अधिनियम १९९२, आणि भारतीय न्याय संहिता २०२३ च्या संबंधित कलमांन्वये गुन्हा दाखल करण्यात आला आहे.
सीमेपल्याड तयार झालेले हे पाकिस्तानी उत्पादन संगमनेरपर्यंत नेमक्या कोणत्या मार्गाने पोहोचले, यामागे कोणते रॅकेट कार्यरत आहे का, तसेच शहरात इतर ठिकाणीही याची बेकायदेशीर विक्री सुरू आहे का, या दिशेने पोलीस उपनिरीक्षक श्रीकांत सावंत व त्यांचे पथक सखोल तपास करत आहेत.
