कोल्हार-घोटी राज्यमार्गावरील सातवा मैल येथे रविवारी सकाळी अपघात घडला आहे. स्कार्पिओ आणि स्कुटी दुचाकीच्या या अपघातात आरुषी कर्पे या विद्यार्थिनीचा मृत्यू झाला आहे.
संगमनेर तालुक्यातील पिंपळगाव कोंझिरा येथील रहिवासी असलेली आरुषी अनिल कर्पे ही विद्यार्थिनी नेहमीप्रमाणे आपल्या स्कुटीवरून क्लाससाठी संगमनेरच्या दिशेने जात असताना हा अपघात झाला. भंडारदरा परिसरामध्ये पर्यटनासाठी निघालेल्या एका भरधाव स्कॉर्पिओ (MH 10 DV 3447) कारने तिच्या स्कुटीला जोरदार धडक दिली. ही धडक इतकी भीषण होती की, आरुषीला या वाहनाने काही अंतर फरफटत नेले, यामुळे तिचा जागीच मृत्यू झाला.
प्रत्यक्षदर्शींच्या अंदाजानुसार, दुसऱ्या वाहनाला धोकादायक रीतीने ओव्हरटेक करत असताना स्कॉर्पिओचा वेग भरधाव होता. सदर पर्यटकांचे वाहन श्रीरामपूर येथील असल्याची प्राथमिक माहिती समोर येत आहे. या अपघातामुळे स्थानिक नागरिकांमध्ये बेफाम वाहनचालकांविरुद्ध प्रचंड संताप व्यक्त केला जात आहे.
याप्रकरणी संगमनेर पोलीस ठाण्यात गुन्हा दाखल करण्याचे काम सुरू असल्याची माहिती समोर आली आहे.
