अकोले तालुक्यातील एका गंभीर प्रकरणात संगमनेर येथील अतिरिक्त सत्र न्यायालयाने बुधवारी (५ ऑगस्ट) आरोपी युवकाची सर्व आरोपांतून निर्दोष मुक्तता केली आहे. किरण किसन सावंत असे मुक्तता करण्यात आलेल्या युवकाचे नाव असून अवघ्या सहा महिन्यात या खटल्याचा न्यायालयाने निर्णय दिला आहे.
अल्पवयीन मुलीचे अपहरण करून तिच्यावर लैंगिक अत्याचार केल्याचा ठपका ठेवत अकोले पोलीस ठाण्यात किरण किसन सावंत या १९ वर्षीय युवकावर गुन्हा दाखल करण्यात आला होता. या प्रकरणात सरकारी पक्षाला आरोप सिद्ध करण्यात अपयश आल्याने न्यायालयाने आरोपीची तात्काळ सुटका करण्याचे आदेश दिले आहेत.
या घटनेची सविस्तर माहिती अशी की, १० डिसेंबर २०२५ रोजी अकोले तालुक्यातील एक अल्पवयीन मुलगी घरातून अचानक बेपत्ता झाली होती. मुलीच्या आईने सुरुवातीला अज्ञात व्यक्तीविरोधात अपहरणाची फिर्याद दिली होती. पोलीस तपासादरम्यान संशयित किरण सावंत या युवकाला अटक करण्यात आली. त्यानंतर पोलिसांनी तपासाअंती आरोपीविरोधात भारतीय न्याय संहिता आणि पोक्सो कायद्याच्या विविध कलमांन्वये न्यायालयात ५ फेब्रुवारीला दोषारोपपत्र दाखल केले होते.
मात्र, न्यायालयात खटल्याच्या सुनावणीदरम्यान महत्त्वाच्या घडामोडी घडल्या. या खटल्यातील मुख्य साक्षीदार असलेली पीडित मुलगी आणि तिची आई न्यायालयात आपल्या जबाबापासून फिरल्या. साक्षीच्या वेळी त्यांनी आरोपीविरोधातील आरोपांना कोणताही दुजोरा दिला नाही. तसेच त्यांनी न्यायालयात आरोपीची ओळख पटवण्यास स्पष्ट नकार दिला आणि अपहरणाचा अथवा अत्याचाराचा कोणताही प्रकार घडला नसल्याचे न्यायालयात सांगितले. मुख्य साक्षीदारच फितूर झाल्यामुळे सरकारी पक्षाला आरोपीविरुद्धचे आरोप सिद्ध करता आले नाहीत.
या प्रकरणात आरोपीच्या वतीने अ‍ॅड. सीमा काळे-सातपुते यांनी काम पाहिले. आरोपी आणि सरकार पक्षाच्या बाजूंचा युक्तिवाद आणि पुरावे विचारात घेत न्यायाधीश धनंजय देशपांडे यांनी सबळ पुराव्यांअभावी आरोपी किरण सावंत याची सर्व आरोपांतून मुक्तता केली, या खटल्याकडे लक्ष लागले होते.
