पुणे-नाशिक रेल्वे आणि एसटीच्या मुद्यावरून संगमनेरमध्ये राजकीय रणकंदन; ‘आमदार साहेब बनवाबनवी थांबवा’, कृती समितीचा आक्रमक इशारा

महाराष्ट्र संवाद न्यूज ऑनलाईन 

संगमनेर:

राज्यभरात एसटी बसेसची अत्यंत केविलवाणी अवस्था झालेली असताना आणि प्रवाशांच्या भरमसाठ तक्रारी असताना, नाशिक-पुणे मार्गावरील बसेसला संगमनेर येथे थांबा मिळवण्यात स्थानिक लोकप्रतिनिधी पूर्णपणे अपयशी ठरले आहेत. आता आगामी आंदोलनाच्या तोंडावर कमिट्या स्थापन करून केवळ देखावा केला जात असून, हा जनतेच्या आंदोलनाची धार बोथट करण्याचा प्रयत्न असल्याचा आरोप पुणे-नाशिक रेल्वे कृती समितीने केला आहे.

परिवहन विभागातर्फे रेल्वेसंदर्भात समिती स्थापन करून जनतेची सरळ सरळ दिशाभूल केली जात आहे. जर राज्य सरकारला हा मार्ग खरोखरच करायचा होता, तर महारेलकडे वर्ग केलेले १ हजार कोटी रुपये माघारी का बोलावले, असा रोकडा सवाल कृती समितीने विचारला आहे.

केंद्रीय रेल्वे मंत्री अश्विनी वैष्णव यांनी संसदेत हा प्रकल्प रद्द झाल्याचे स्पष्ट केले असताना, संगमनेर नगरपालिकेच्या प्रचारात उतरलेल्या पक्षाच्या युवा खासदाराने संसदेत आवाज का उठवला नाही, असा प्रश्नही उपस्थित करण्यात आला आहे. १ रुपयाचाही निधी न मिळणे आणि सर्वोच्च न्यायालयात याचिका फेटाळली गेल्याने आलेल्या नैराश्यातून संगमनेरवासीयांच्या तीन पिढ्यांच्या स्वप्नाला छेद देण्याचा प्रयत्न लोकप्रतिनिधींनी करू नये, असा स्पष्ट इशारा देण्यात आला आहे.

पुणे-नाशिक रेल्वे कृती समितीच्या वतीने सतीश खताळ, रवींद्र हासे, प्रवीण हासे, रामेश्वर पानसरे, प्रितम साबळे, अजय हासे, शिवाजी जगताप, विजय उदावंत, अमोल शेलकर, शिवाजी गुंजाळ, निलेश गुंजाळ, प्रकाश कडलग, समीर लामखडे, राहुल गायकर, मोहसीन शेख, अनिल गुंजाळ, संदीप काकड, डॉ. सचिन वाळे, ॲड. अनिल गोडसे, राम अरगडे, अरुण चव्हाण, ओंकार बिडवे, सत्यजित थोरात, प्रदीप हासे आणि प्रवीण काकड यांनी हा इशारा दिला आहे.