बोटा परिसरात स्कॉर्पिओतून होणारी बेकायदेशीर दारू वाहतूक घारगाव पोलिसांकडून उघडकीस; ५ लाख ३२ हजारांचा मुद्देमाल जप्त

महाराष्ट्र संवाद न्यूज ऑनलाईन –

वरिष्ठांच्या आदेशानुसार घारगाव पोलिसांनी बोटा परिसरात अवैध धंद्यांवर मोठी कारवाई करत बेकायदेशीर देशी-विदेशी दारूची वाहतूक करणारी स्कॉर्पिओ गाडी पकडली आहे. या कारवाईत तब्बल ५ लाख ३२ हजार रुपयांचा मुद्देमाल जप्त करण्यात आला असून दोन जणांवर गुन्हा दाखल करण्यात आला आहे.

घारगाव पोलीस ठाण्याच्या हद्दीतील बोटा परिसरामध्ये पुणे-नाशिक महामार्गाने एका काळ्या रंगाच्या स्कॉर्पिओ गाडीतून (क्र. MH 14 CS 4602) बेकायदेशीर दारूची वाहतूक होणार असल्याची गुप्त माहिती पोलिसांना मिळाली होती.

या माहितीच्या आधारे पोलिसांनी बोटा गावाजवळील बोगद्याच्या साईड रोडला सापळा रचून सदर कार थांबवली. गाडीची पंचांसमक्ष तपासणी केली असता त्यामध्ये विविध कंपन्यांच्या देशी व विदेशी दारूच्या सीलबंद बाटल्या आढळून आल्या.

या कारवाईत ३२,००० रुपये किमतीचा दारूचा साठा आणि ५,००,००० रुपये किमतीची स्कॉर्पिओ कार असा एकूण ५,३२,००० रुपयांचा मुद्देमाल जप्त करण्यात आला. याप्रकरणी चालक दौलत साहेबराव महाले (वय ३२) आणि गणेश पांडुरंग फापाळे (वय ४६, दोघे रा. बेलापूर, ता. अकोले) यांच्यावर महाराष्ट्र प्रोहिबिशन ॲक्टनुसार गुन्हा दाखल करण्यात आला आहे.

आरोपींनी ही दारू आळेफाटा येथील ‘हेरिटेज वाईन’मधून आणल्याचे तपासात समोर आले असून, ही गाडी सतीश बाळाजी गांगुर्डे यांची असल्याचे सांगण्यात आले आहे.

ही कारवाई पोलीस अधीक्षक मुम्मका सुदर्शन, अप्पर पोलीस अधीक्षक सोमनाथ वाघचौरे, उपविभागीय पोलीस अधिकारी कुणाल सोनवणे यांच्या मार्गदर्शनाखाली घारगाव पोलीस ठाण्याचे पोलीस निरीक्षक बाबासाहेब बोरसे, पोलीस अंमलदार प्रमोद गाडेकर, सुभाष बोडखे, सचिन धनाड आणि सहकाऱ्यांनी केली आहे. पोलीस या प्रकरणाचा पुढील तपास करत आहेत.