चहा पिण्याच्या बहाण्याने आलेल्या चोरट्यांनी आजींच्या गळ्यातील सोन्याची पोत पळवली

महाराष्ट्र संवाद न्यूज ऑनलाईन
संगमनेर:
आश्वी परिसरात दिवसाढवळ्या घडलेल्या एका धक्कादायक घटनेत अज्ञात दोन भामट्यांनी एका ७० वर्षीय ज्येष्ठ महिलेच्या गळ्यातील सोन्याची पोत हिसकावून पोबारा केल्याची घटना घडली आहे. आश्वी-प्रतापपूर रस्त्यावरील आंधळे पेट्रोल पंपाजवळ बुधवारी सायंकाळी पाचच्या सुमारास ही घटना घडली असून, या धाडसी चोरीमुळे परिसरात खळबळ उडाली आहे.
प्रतापपूर येथील रहिवासी असलेल्या ७० वर्षीय शकुंतला गंगाधर चतुरे या आंधळे पेट्रोल पंपाजवळ चहाची टपरी चालवून आपला उदरनिर्वाह करतात. नेहमीप्रमाणे बुधवारी सायंकाळी ५:१५ वाजेच्या सुमारास त्या दुकानात असताना दोन अज्ञात इसम तेथे आले. त्यांनी चहा मागण्याच्या बहाण्याने शकुंतला यांच्याशी संवाद साधला.
दुकानात आणि आसपास गर्दी नसल्याचा फायदा घेत या भामट्यांनी अचानक शकुंतला यांच्या गळ्यातील सुमारे ४० हजार रुपये किंमतीची व एक तोळा वजनाची सोन्याची पोत बळजबरीने हिसकावून घेतली. शकुंतला काही समजायच्या आतच चोरट्यांनी आपल्या दुचाकीवरून क्षणात पळ काढला.
अचानक झालेल्या या हल्ल्यामुळे भयभीत झालेल्या शकुंतला चतुरे यांनी आरडाओरड केली, मात्र तोपर्यंत चोरटे दूर निघून गेले होते. या घटनेनंतर घाबरलेल्या शकुंतला यांनी तातडीने पोलिसांत धाव घेऊन तक्रार नोंदवली. त्यांनी दिलेल्या फिर्यादीवरून आश्‍वी पोलीस ठाण्यात गुन्हा रजिस्टर नंबर १६२/२०२६ नुसार भारतीय न्याय संहिता कलम ३०४(२) अन्वये दोन अज्ञात चोरट्यांविरुद्ध गुन्हा दाखल करण्यात आला आहे.
भरदिवसा आणि गजबजलेल्या रस्त्यानजीक घडलेल्या या चोरीच्या घटनेमुळे आश्वी परिसरातील नागरिकांमध्ये, विशेषतः एकट्या राहणाऱ्या ज्येष्ठ नागरिकांमध्ये भीतीचे सावट पसरले आहे. पोलिसांच्या गस्तीवर प्रश्नचिन्ह उपस्थित केले जात असून, या सराईत चोरट्यांचा तात्काळ शोध घेऊन त्यांना जेरबंद करावे, अशी जोरदार मागणी स्थानिक नागरिकांमधून केली जात आहे.