स्थानिक गुन्हे शाखेच्या पथकाने संगमनेर शहरात बेकायदेशीर वाळू वाहतुकीवर मोठी कारवाई केली आहे. या कारवाईदरम्यान दोन आरोपींना ताब्यात घेण्यात आले असून, त्यांच्याकडून विनाक्रमांकाचा ट्रॅक्टर आणि वाळू असा एकूण ६ लाख १० हजार रुपये किमतीचा मुद्देमाल जप्त करण्यात आला आहे.
अहिल्यानगर जिल्हा पोलीस अधीक्षक मुम्मका सुदर्शन यांच्या मार्गदर्शनाखाली स्थानिक गुन्हे शाखेचे पोलीस निरीक्षक संतोष मुटकुळे यांच्या नेतृत्वाखालील पथक गुरुवारी पहाटे (२४ सप्टेंबर) संगमनेर शहर पोलीस ठाण्याच्या हद्दीत गस्त घालत असताना, खांडगाव चौफुला कडून वैदुवाडीकडे लाल रंगाच्या ट्रॅक्टरमधून अवैध वाळू वाहतूक होणार असल्याची गुप्त माहिती मिळाली. माहितीच्या आधारे पथकाने खांडगाव रोडवर सापळा रचून संशयास्पद ट्रॅक्टर अडवला. ट्रॅक्टर ट्रॉलीची पाहणी केली असता त्यात बेकायदेशीर वाळू आढळून आली.
याप्रकरणी खांडगाव येथील रहिवासी अभिषेक प्रभाकर गुंजाळ (वय २९) आणि गणेश अशोक बालोडे (वय ३२) या दोघांना घटनास्थळावरून ताब्यात घेण्यात आले. वाळू वाहतुकीचा परवाना मागितला असता आरोपींकडे कोणताही परवाना उपलब्ध नव्हता. पोलिसांनी ६ लाख रुपये किमतीचा महिंद्रा ट्रॅक्टर-ट्रॉली आणि १० हजार रुपयांची वाळू असा मुद्देमाल जप्त केला आहे.
या प्रकरणी संगमनेर शहर पोलीस ठाण्यात भारतीय न्याय संहिता (BNS) २०२३ मधील कलम ३०३(२), ३(५) सह पर्यावरण संरक्षण कायद्यातील कलम ३ व १५ अन्वये गुन्हा नोंदवण्यात आला आहे.
या कारवाईत पोलीस अंमलदार अरुण गांगुर्डे, निळकंठ कारखेले, सोमनाथ झांबरे, रणजीत जाधव, बाळासाहेब गुंजाळ आणि सतीश भवर यांच्या पथकाने सहभाग घेतला असून संगमनेर शहर पोलीस पुढील तपास करत आहेत.
