संगमनेर ड्रग्ज प्रकरणातील सत्य जनतेसमोर आणा; सोशल मीडियावरील ‘मीडिया ट्रायल’ त्वरित थांबवा! — काँग्रेस कार्याध्यक्ष अमोल शेलकर यांचे पोलीस प्रशासनाला आवाहन; वरिष्ठ पोलीस अधिकाऱ्यांनी संयुक्त पत्रकार परिषद घेऊन पारदर्शक चौकशीचे पुरावे मांडण्याची मागणी

महाराष्ट्र संवाद न्यूज ऑनलाईन-
संगमनेर शहरात सध्या वादळ उठवणाऱ्या कथित एमडी ड्रग्ज प्रकरणाने संपूर्ण जिल्ह्यात एकच खळबळ उडवून दिली असून, या प्रकरणाभोवती राजकीय आरोप-प्रत्यारोप आणि सोशल मीडियावरील अफवांचे पीक आले आहे. या प्रकरणातील धुळवड आणि परस्परविरोधी दाव्यांमुळे सामान्य नागरिकांमध्ये निर्माण झालेला संभ्रम दूर करण्यासाठी आता पोलीस प्रशासनानेच पुढाकार घेण्याची गरज निर्माण झाली आहे. या संपूर्ण प्रकरणाची नेमकी वस्तुस्थिती काय आहे, हे वरिष्ठ पोलिस अधिकाऱ्यांनी अधिकृतपणे जनतेसमोर मांडावे आणि माध्यमांमधील अपप्रचार व सोशल मीडिया ट्रायल त्वरित थांबवावी, अशी आक्रमक मागणी काँग्रेसचे संगमनेर तालुका कार्याध्यक्ष अमोल शेलकर यांनी केली आहे.
संबंधित कुटुंबीयांनी पोलिसांच्या कारवाईवर थेट प्रश्नचिन्ह उपस्थित करत घटनेचे सीसीटीव्ही फुटेज सार्वजनिक केल्याने या प्रकरणाला अत्यंत नाट्यमय वळण मिळाले आहे. या फुटेजच्या आधारे पोलिसांनी केलेल्या कारवाईवर गंभीर शंका व्यक्त केल्या जात असून, त्यानंतर वरिष्ठ पोलीस अधिकाऱ्यांनी या प्रकरणाची अंतर्गत चौकशी सुरू केली आहे.
तसेच तपासाची दिशा अधिक निष्पक्ष राहावी यासाठी हा तपास स्थानिक गुन्हे शाखेकडे (LCB) वर्ग करण्यात आला आहे. मात्र, केवळ अंतर्गत चौकशीवर नागरिक समाधानी नसून, प्रशासनाने जनतेला विश्वासात घेणे आवश्यक बनले आहे.
या पार्श्वभूमीवर अपर पोलीस अधीक्षक सोमनाथ वाकचौरे, उपअधीक्षक कुणाल सोनवणे आणि पोलीस निरीक्षक समीर बारवकर यांनी कसलाही विलंब न लावता संयुक्त पत्रकार परिषद घ्यावी, अशी थेट मागणी अमोल शेलकर यांनी केली आहे.
अमली पदार्थांसारखा अत्यंत गंभीर विषय हा राजकीय चिखलफेकीचा किंवा सोशल मीडियावरील चर्चेचा विषय बनू नये, तर त्याला कायद्याच्या चौकटीत राहून पारदर्शकपणे हाताळले पाहिजे. जर पोलिसांची कारवाई कायदेशीर आणि योग्य असेल तर त्याचे पुरावे त्यांनी निःसंकोचपणे जनतेसमोर ठेवावेत, असेही शेलकर यांनी स्पष्ट केले.
एखाद्या कारवाईदरम्यान नियमांचे तंतोतंत पालन झाले आहे का, जप्ती आणि पंचनामा प्रक्रियेत पारदर्शकता होती का, तसेच फुटेजमधील दृश्ये आणि पोलिसांचा दावा यातील तफावतीचे सत्य काय, या सर्व प्रश्नांची उत्तरे पोलिसांनी अधिकृतपणे देणे गरजेचे आहे. अमली पदार्थांविरोधातील कठोर कारवाईला सर्वांचाच पाठिंबा आहे, परंतु त्या नावाखाली कोणत्याही निष्पाप नागरिकावर अन्याय होणार नाही याची खबरदारी प्रशासनाने घेतली पाहिजे.
आरोपी खरोखरच दोषी असेल तर त्याच्यावर कायद्याचा बडगा उगरलाच पाहिजे, मात्र जर कारवाईबाबत शंका असतील तर सत्य दडपून न ठेवता ते उघडकीस आले पाहिजे. संगमनेरच्या जनतेला या प्रकरणातील खरा सचोटीचा प्रकार जाणून घेण्याचा पूर्ण अधिकार असून, पोलिसांनी अधिकृत माहिती देऊन अफवांना पूर्णविराम द्यावा, असा सूर आता उमटू लागला आहे.