लावणीचा युवक महोत्सवात लोकनृत्य म्हणून समावेश करण्यासाठी शासनस्तरावर प्रयत्न करणार : पद्मश्री रघुवीर खेडकर

महाराष्ट्र संवाद न्यूज ऑनलाईन 

संगमनेर:

लावणीचा युवक महोत्सवात लोकनृत्य म्हणून समावेश करण्यासाठी शासनस्तरावर प्रयत्न करणार असल्याचे पद्मश्री रघुवीर खेडकर यांनी म्हटले आहे. यामुळे शासन स्तरावर लावणीला लोकनृत्याचा दर्जा मिळण्याची चिन्हे निर्माण झाली आहे.

अखिल भारतीय मराठी नाट्य परिषदेच्या संगमनेर शाखेच्या वतीने पद्मश्री पुरस्कारप्राप्त ज्येष्ठ लोककलावंत रघुवीर खेडकर यांचा नुकताच सत्कार करण्यात आला. या सत्कार प्रसंगी संगमनेर नाट्य परिषदेचे अध्यक्ष डॉ. संजयकुमार दळवी, प्रमुख कार्यवाह विशाल कदम, उपाध्यक्ष बाबासाहेब मेमाणे, द्वारकानाथ जाधव, दत्ता बटवाल आदी मान्यवर उपस्थित होते

सत्कार प्रसंगी नाट्य परिषदेच्या संगमनेर शाखेचे अध्यक्ष डॉ. संजयकुमार दळवी यांनी राज्यपाल कार्यालयामार्फत गेल्या २१ वर्षांपासून आयोजित होणाऱ्या ‘इंद्रधनुष्य’ या अंतरविद्यापीठ युवक महोत्सवात अद्याप लावणीचा लोकनृत्य म्हणून समावेश झालेला नाही, याकडे खेडकर यांचे लक्ष वेधले. राज्यात समावेश नसल्यामुळे अखिल भारतीय विद्यापीठ महासंघाच्या राष्ट्रीय युवक महोत्सवातही लावणीला लोकनृत्याचे स्थान मिळालेले नाही, ही बाब महाराष्ट्रासाठी भूषणावह नसल्याचे त्यांनी सांगितले. यावर पद्मश्री रघुवीर खेडकर यांनी तातडीने शासन दरबारी सर्वतोपरी प्रयत्न करण्याचे आश्वासन दिले.

तमाशा आणि लोकनाट्य क्षेत्रातील योगदानाबद्दल केंद्र सरकारने पद्मश्री पुरस्काराने सन्मानित केल्यानंतर, आता खेडकर यांच्या पुढाकारामुळे लावणीला लोकनृत्याचा दर्जा मिळेल असा विश्वास डॉ. दळवी यांनी व्यक्त केला. लावणीचा युवक महोत्सवात समावेश झाल्यास उपेक्षित असलेल्या या कलाप्रकाराचा अभ्यास, प्रचार आणि प्रसार होण्यास मोठी चालना मिळेल असे खेडकर यांनी नमूद केले. तसेच लोककलावंत परिषद आणि तमाशा परिषद या संस्थांच्या माध्यमातून व वैयक्तिक पातळीवरही या विषयाचा पाठपुरावा करणार असल्याचे त्यांनी स्पष्ट केले.