संगमनेरमध्ये २६,५८७ रद्द मतदारांची गावनिहाय यादी जाहीर करण्याची अमोल शेलकर यांची मागणी; प्रशासनाकडे पारदर्शकता आणण्याचा आग्रह

Annant Ppangarkar

महाराष्ट्र संवाद न्यूज ऑनलाईन –

संगमनेर विधानसभा मतदारसंघातील विशेष संक्षिप्त पुनरीक्षण (SIR) प्रक्रियेनंतर तब्बल २६,५८७ मतदारांची नावे रद्द करण्यात आल्याने नागरिकांमध्ये मोठा संभ्रम निर्माण झाला आहे. हा संभ्रम दूर करण्यासाठी आणि संपूर्ण प्रक्रिया पारदर्शक करण्यासाठी प्रशासनाने रद्द झालेल्या मतदारांची गाव, शहर आणि वॉर्डनिहाय स्वतंत्र यादी तातडीने जाहीर करावी, अशी आग्रही मागणी काँग्रेसचे कार्याध्यक्ष अमोल शेलकर यांनी केली आहे.

तालुक्यात SIR अंतर्गत पार पडलेल्या मतदार यादी मोहिमेनंतर हजारो मतदारांची नावे वगळण्यात आली आहेत. मात्र, आपले नाव यादीत आहे की नाही हे शोधण्यासाठी नागरिकांना मोठा वेळ घालवावा लागत आहे. जर महसूल प्रशासनाने २६,५८७ रद्द मतदारांची यादी स्वतंत्रपणे सार्वजनिक केली, तर नागरिकांना आपले नाव तपासणे सोपे होईल आणि प्रशासनाचा कारभार अधिक सुलभ ठरेल, असे शेलकर यांनी स्पष्ट केले.

एखाद्या पात्र मतदाराचे नाव यादीतून का वगळले गेले, त्यामागील नेमके कारण काय आहे आणि नाव पुन्हा समाविष्ट करण्यासाठी कोणती कायदेशीर प्रक्रिया पूर्ण करावी लागेल, याविषयी सध्या मतदारांमध्ये स्पष्टता नाही. त्यामुळे प्रशासनाने नाव रद्द होण्याची कारणे, हरकत नोंदवण्याची पद्धत, त्यासाठी लागणारी आवश्यक कागदपत्रे आणि नाव पुनर्स्थापनेची संपूर्ण माहिती जाहीर करावी.

यासोबतच, SIR प्रक्रियेदरम्यान मतदार याद्यांमध्ये नावांचे इंग्रजी स्पेलिंग, वडिलांचे नाव आणि आडनाव यामध्ये मोठ्या प्रमाणावर चुका झाल्याच्या तक्रारी समोर येत आहेत. मराठी नावांचे इंग्रजी भाषांतर करताना अक्षरांची अदलाबदल झाल्यामुळे एकाच कुटुंबातील सदस्यांच्या नावात तफावत निर्माण झाली आहे. या स्पेलिंगच्या चुका दुरुस्त करण्यासाठी प्रशासनाने सोपी आणि ऑनलाईन किंवा ऑफलाईन स्वरूपातील सुलभ सुविधा उपलब्ध करून देणे गरजेचे आहे.

रद्द झालेल्या मतदारांना आणि दुरुस्ती करू इच्छिणाऱ्या नागरिकांना मार्गदर्शन करण्यासाठी महसूल विभागाने विशेष सुविधा केंद्र (हेल्प डेस्क) सुरू करावे, अशी मागणीही आता जोर धरत आहे. मतदार यादी हा लोकशाहीचा पाया असल्याने प्रशासनाने कोणतीही दिरंगाई न करता रद्द यादी, कारणे आणि दुरुस्तीची प्रक्रिया तातडीने सार्वजनिक करावी, अशी मागणी नागरिकांमधून व्यक्त होत आहे.