स्थानिक पोलिसांच्या कारभारावर प्रश्नचिन्ह!, संगमनेरमध्ये स्थानिक गुन्हे शाखेचा छापा; कत्तलीसाठी डांबलेली १४ गोवंशीय जनावरे मुक्त, १ लाखांचा मुद्देमाल जप्त

Annant Ppangarkar

महाराष्ट्र संवाद न्यूज ऑनलाईन –

अहिल्यानगर स्थानिक गुन्हे शाखेच्या पथकाने संगमनेर शहर पोलीस ठाण्याच्या हद्दीत धडक कारवाई करत कत्तलीच्या उद्देशाने डांबून ठेवलेल्या १४ लहान-मोठ्या गोवंशीय जनावरांची सुटका केली आहे. या कारवाईत सुमारे १ लाख रुपये किमतीचा मुद्देमाल जप्त करण्यात आला असून, पाच फरार आरोपींविरोधात विविध कलमान्वये गुन्हे दाखल करण्यात आले आहेत.

अहिल्यानगरचे पोलीस अधीक्षक मुम्मका सुदर्शन यांनी जिल्ह्यातील अवैध व्यावसायिकांवर कठोर कारवाई करण्याचे आदेश स्थानिक गुन्हे शाखेला दिले होते. त्यानुसार पोलीस निरीक्षक संतोष मुटकुळे यांच्या मार्गदर्शनाखाली पोलीस उपनिरीक्षक विकास जाधव, पोलीस अंमलदार विजय पवार, रिचर्ड गायकवाड, राहुल डोके, भगवान थोरात, सुनील मालणकर आणि महादेव भांड यांच्या पथकाने संगमनेर शहरात तपासाची चक्रे फिरवली.

तपासादरम्यान, कुरण येथील रहिवासी जमील शेख याने आपल्या पत्र्याच्या शेडमध्ये आणि मोकळ्या जागेत गोवंशीय जनावरे कत्तल करण्याच्या उद्देशाने डांबून ठेवल्याची गोपनीय माहिती पथकाला मिळाली. या माहितीच्या आधारे पोलिसांनी पंचांसमक्ष तात्काळ घटनास्थळी छापा टाकला. तेथे १४ लहान-मोठी गोवंशीय जनावरे अत्यंत निर्दयीपणे बांधून ठेवल्याचे आढळून आले.

स्थानिक नागरिकांकडे चौकशी केली असता ही जनावरे कुरण येथील रहिवासी जमील उर्फ जमालुद्दीन शेख, अशपाक राजू शेख, तनवीर मुन्ना पठाण, आदिल शेख आणि सलमान शेख यांच्या मालकीची असल्याचे निष्पन्न झाले. पोलीस पथकाने सर्व फरार आरोपींचा शोध घेतला, मात्र ते मिळून आले नाहीत.

याप्रकरणी सर्व आरोपींविरोधात संगमनेर शहर पोलीस ठाण्यात महाराष्ट्र पशुसंरक्षण अधिनियम आणि प्राण्यांना निर्दयतेने वागवल्याप्रकरणी विविध कलमान्वये गुन्हा दाखल करण्यात आला आहे. सर्व जनावरे ताब्यात घेण्यात आली असून, या कारवाईमुळे स्थानिक पोलिसांच्या कार्यक्षमतेवर प्रश्नचिन्ह निर्माण झाले आहे. पुढील तपास संगमनेर शहर पोलीस ठाण्याचे अधिकारी करत आहेत.