अन्न व औषध प्रशासनाची मोठी कारवाई; सुमारे चार कोटी रुपयांचे संशयास्पद बटर जप्त

Annant Ppangarkar

महाराष्ट्र संवाद न्यूज ऑनलाईन –

आगामी सणासुदीच्या पार्श्वभूमीवर अन्न व औषध प्रशासन विभागाने (FDA) अहिल्यानगरमध्ये एक मोठी आणि धडक कारवाई करत तब्बल ३ कोटी ९५ लाख ६२ हजार ३२० रुपये किंमतीचे ७५ हजार ३५६ किलो वजनाचे संशयास्पद बटर जप्त केले आहे. 

एमआयडीसी भागातील एका शीतगृहावर गुरुवारी रात्री ८ वाजेच्या सुमारास टाकलेली ही धाड शुक्रवारी सकाळी संपली. जप्त करण्यात आलेले बटर कमी दर्जाचे असल्याचा संशय असून त्यावर मुदत संपण्याच्या तारखेचा उल्लेख नसल्याने लेबल वर्णनाचे उल्लंघन झाल्याचे समोर आले आहे.

मिळालेल्या माहितीनुसार, पुणे जिल्ह्यातील पाटस (ता. दौंड) येथील ‘मधुरमा क्रिमी डिलाईट’ या कंपनीने या पाश्चराईज्ड कुकिंग (अनसोल्टेड) बटरची निर्मिती केली होती. हे बटर अहिल्यानगरच्या एमआयडीसीमधील ‘अरिहंत कोल्ड स्टोरेज’मध्ये साठवून ठेवण्यात आले होते. प्राथमिक अंदाजानुसार हा अन्नपदार्थाचा साठा पतंजली फूड्स लिमिटेड कंपनीशी संबंधित असल्याचे अन्न व औषध प्रशासनाचे सहाय्यक आयुक्त गौरव जगताप यांनी स्पष्ट केले आहे. या कोल्ड स्टोरेजमधून हे बटर संपूर्ण महाराष्ट्रभर वितरीत केले जाण्याचा संशय अधिकाऱ्यांनी व्यक्त केला असून त्या दृष्टीने पुढील तपास वेगाने सुरू आहे.

कारवाई दरम्यान अन्नसुरक्षा अधिकाऱ्यांच्या पथकाने साठ्यातून बटरचे नमुने विश्लेषणासाठी शासकीय प्रयोगशाळेत पाठवले आहेत. या नमुन्यांचा प्रयोगशाळा अहवाल प्राप्त झाल्यानंतरच पुढील कायदेशीर कारवाईची दिशा स्पष्ट होईल. ही धडक कारवाई अन्न व औषध प्रशासन विभागाचे आयुक्त तुकाराम मुंडे यांच्या आदेशानुसार आणि सहआयुक्त एम. यु. माने (नाशिक) यांच्या मार्गदर्शनाखाली पार पडली. या पथकात अन्नसुरक्षा अधिकारी राजेश बडे, पी. पी. पवार, किरण जगदाळे आणि प्रसाद कसबेकर यांचा समावेश होता.

सणासुदीच्या दिवसांत नागरिकांच्या आरोग्याशी खेळणाऱ्या भेसळयुक्त अन्नपदार्थांवर आळा घालण्यासाठी ही कारवाई करण्यात आली असून, अन्नसुरक्षा विभागाची आजवरची ही सर्वात मोठी कारवाई मानली जात आहे. ऐन सणांच्या तोंडावर झालेल्या या मोठ्या कारवाईमुळे राज्यभरातील मिठाई उत्पादक आणि खाद्यपदार्थ विक्रेत्यांमध्ये मोठी खळबळ उडाली आहे.

दरम्यान, सणासुदीच्या काळात शहरातील कोणत्याही व्यापाऱ्याने किंवा मिठाई उत्पादकाने कमी दर्जाचे अथवा अस्वच्छ ठिकाणी तयार केलेले अन्नपदार्थ विकू नयेत, असा सक्त इशारा प्रशासनाने दिला आहे. तसेच बाहेरील राज्यातून ट्रॅव्हल्स किंवा इतर वाहनांद्वारे कमी दर्जाचे अन्नपदार्थ अस्वच्छ वातावरणात मागवल्यास अथवा त्याची वाहतूक केल्यास संबंधित ट्रॅव्हल्स एजन्सीवरही कडक कायदेशीर कारवाई केली जाईल, असा स्पष्ट इशारा सहाय्यक आयुक्त गौरव जगताप यांनी दिला आहे.