मुलींचे शिक्षण ही समाजाची ताकद; पालिका शाळेच्या विकासासाठी शिवसेना कटिबद्ध – नगरसेविका साक्षी सूर्यवंशी

महाराष्ट्र संवाद न्यूज ऑनलाईन-

मुलींचे शिक्षण ही समाजाची सर्वांत मोठी ताकद आहे. नगरपरिषदेच्या शाळेतील विद्यार्थिनींना कोणत्याही सुविधांपासून वंचित राहावे लागू नये, यासाठी आपण कटिबद्ध आहोत. शाळेसंदर्भात शिक्षकांनी मांडलेल्या समस्या रास्त असून, नगरपालिकेच्या आगामी बैठकीत हा विषय मांडून शाळेसाठी आवश्यक तो निधी आणि भौतिक सुविधा लवकरात लवकर उपलब्ध करून दिल्या जातील. शाळा प्रशासनाला जेव्हा जेव्हा मदतीची गरज भासेल, तेव्हा शिवसेना त्यांच्या पाठीशी खंबीरपणे उभी असेल, असा विश्वास शिवसेना शिंदे गटाच्या नगरसेविका साक्षी सूर्यवंशी यांनी दिला.

नगरपरिषदेच्या शाळांमधील विद्यार्थिनींना दर्जेदार शिक्षण आणि मूलभूत सुविधा मिळवून देण्यासाठी लोकप्रतिनिधींनी पुढाकार घेणे गरजेचे आहे. याच भावनेतून शिवसेना नगरसेविका सूर्यवंशी यांनी संगमनेर नगरपरिषदेच्या घासबाजार येथील अहिल्यादेवी कन्या शाळा क्र. ४ ला भेट देऊन पाहणी केली. या भेटीदरम्यान त्यांनी शाळेच्या भौतिक परिस्थितीचा प्रत्यक्ष आढावा घेत विद्यार्थिनींशी संवाद साधला तसेच प्रशासनाला भेडसावणाऱ्या समस्या तातडीने सोडवण्याचे खंबीर आश्वासन दिले.

आपल्या पाहणी दौऱ्यात सूर्यवंशी यांनी प्रत्येक वर्गात जाऊन विद्यार्थिनींशी आपुलकीने विचारपूस केली. मुलींचा अभ्यासातील रस आणि त्यांच्या आवडीनिवडी जाणून घेत त्यांनी विद्यार्थिनींचा आत्मविश्वास वाढवला. त्यानंतर त्यांनी संपूर्ण शाळा परिसराची बारकाईने पाहणी केली. यामध्ये वर्गांमधील प्रकाशयोजना, हवेशीरपणा, पिण्याच्या पाण्याची सोय, स्वच्छतागृहांची स्वच्छता आणि क्रीडांगणाची सद्यस्थिती यांची प्रत्यक्ष पाहणी करून आवश्यक सुधारणांची नोंद घेतली.

पाहणीनंतर शाळेचे मुख्याध्यापक, शिक्षकवृंद आणि कर्मचाऱ्यांसोबत एक विशेष बैठक पार पाडली. या बैठकीत शिक्षकांनी शाळेसमोरील विविध अडचणी, शैक्षणिक साहित्याची भासणारी कमतरता आणि इमारतीच्या दुरुस्तीची प्रलंबित कामे याविषयी सविस्तर माहिती त्यांच्या निदर्शनास आणून दिली.

लोकप्रतिनिधींनी स्वतःहून शाळेत येऊन समस्यांची दखल घेतल्याबद्दल मुख्याध्यापक, शिक्षक आणि पालकांनी सूर्यवंशी यांचे आभार मानले. या पुढाकारामुळे शाळेच्या प्रलंबित प्रश्नांना लवकरच मोकळा श्वास मिळेल आणि मुलींना उत्तम शैक्षणिक वातावरण लाभेल, अशी आशा व्यक्त होत आहे.