शांतता समितीचा प्रशासनाला विसर; ‘ठाकरे’ शिवसेनेचा थेट हल्लाबोल, शहरप्रमुख अमित चव्हाणांनी वेधले लक्ष!

Annant Ppangarkar

महाराष्ट्र संवाद न्यूज ऑनलाईन –
शहरातील धार्मिक आणि सामाजिक सलोखा राखण्यासाठी अत्यंत महत्त्वाची मानली जाणारी ‘शांतता समिती बैठक’ आयोजित करण्याचा विसर प्रशासनाला पडला की बैठक जाणीवपूर्वक टाळली आहे. शांतता समितीच्या माध्यमातून प्रशासनाच्या उणिवांवर बोट ठेवून जबाबदार अधिकाऱ्यांना प्रश्न, जाब विचारण्याचा संगमनेरकरांचा हक्कच प्रशासनाने हिरावून घेतल्याचा थेट आणि गंभीर आरोप शिवसेना (उद्धव बाळासाहेब ठाकरे) पक्षाचे संगमनेर शहर प्रमुख अमित चव्हाण यांनी केला आहे.
गणेशोत्सवाच्या पार्श्वभूमीवर श्रींचे आगमन अवघ्या एका दिवसावर येऊन ठेपले असताना संगमनेर स्थानिक प्रशासनाच्या कारभारावर नागरिकांमधून प्रचंड तीव्र संताप व्यक्त होत आहे.
इतिहासात संगमनेर शहराची अतिसंवेदनशील म्हणून नोंद असल्याने कोणत्याही मोठ्या धार्मिक सणांच्या पार्श्वभूमीवर पोलीस आणि महसूल प्रशासनाकडून विशेष खबरदारी घेतली जाते. गेल्या काही काळात संगमनेरने शांतता आणि सामाजिक सौहार्दाच्या दिशेने आश्वासक वाटचाल केली असली, तरी पुन्हा एकदा शहरात विघ्नसंतोषी प्रवृत्ती डोके वर काढताना दिसत आहेत. या पार्श्वभूमीवर गणेशोत्सवासारख्या भव्य आणि संवेदनशील सणासाठी दरवर्षी पोलीस प्रशासनाकडून शांतता समितीची बैठक आयोजित करणे अनिवार्य मानले जाते. या बैठकीत मुख्यत्वे मिरवणूक मार्ग, प्रवरा नदीपात्रातील पाण्याची स्थिती, वीज पुरवठा, वाहतूक कोंडीची समस्या, गुन्हेगारी प्रवृत्तींवर झालेली कारवाई आणि आगामी काळात प्रशासनाची सतर्कता यावर सविस्तर चर्चा केली जाते.
शांतता समितीच्या बैठकीमध्ये संगमनेरकर नागरिक आणि विविध गणेश मंडळांचे पदाधिकारी प्रशासनासमोर समस्यांचा पाढा वाचतात आणि अनेकदा अधिकाऱ्यांना जाब विचारतात. या चर्चेतून कधीकधी वातावरणात काही काळ तणाव निर्माण होत असला, तरी अखेर याच बैठकीच्या माध्यमातून गणेशोत्सव मंडळाचे कार्यकर्ते आणि प्रशासन यांच्यात सुसंवाद घडवून आणण्यास मदत होते. शहराची शांतता अबाधित ठेवण्यासाठी सर्व गणेश मंडळे एकजुटीने काम करत असली, तरी काही विघ्नसंतोषी लोकांमुळे उत्सवाला गालबोट लागण्याचा धोका कायम असतो. त्यामुळे प्रशासनाने सुरक्षेच्या दृष्टीने नेमकी काय तयारी केली आहे, याची ठोस माहिती मिळणे संगमनेरकरांसाठी अत्यंत गरजेचे असते.
विशेष म्हणजे जिल्ह्याचे पोलीस अधीक्षक मुमक्का सुदर्शन यांनी अहमदनगर जिल्ह्यातील इतर अनेक ठिकाणी स्वतः बैठका घेऊन गणेशोत्सव तयारीचा आढावा घेतला आहे. मात्र, संगमनेरमधील स्थानिक पोलीस आणि प्रशासकीय अधिकाऱ्यांनी अद्याप एकही बैठक न घेतल्यामुळे यंदा शांतता समितीच्या परंपरेत मोठा खंड पडण्याची चिन्हे आहेत. सण अवघ्या काही तासांवर आला तरी प्रशासनाची ही उदासीनता कायम असल्याने, अधिकाऱ्यांच्या या मनमानी आणि बेजबाबदार कारभाराविरोधात संगमनेरकरांमध्ये तीव्र रोष निर्माण होण्याची शक्यता अमित चव्हाण यांनी व्यक्त केली आहे.