संगमनेर शहरात वाहतूक कोंडीचा बोजवारा: बेशिस्त रिक्षाचालक, फुटपाथवरील अतिक्रमणे अन् अवैध पार्किंगमुळे नागरिक त्रस्त; पोलीस प्रशासन ढिम्म

महाराष्ट्र संवाद न्यूज ऑनलाईन –

संगमनेर शहरातील सर्वच प्रमुख चौकांमध्ये वाहतुकीची समस्या अत्यंत गंभीर बनली असून दररोज लागणाऱ्या वाहनांच्या लांबच लांब रांगांमुळे नागरिक पूर्णपणे बेजार झाले आहेत. वाहतूक पोलिसांचे दुर्लक्ष, चौकांमधील सिग्नल यंत्रणेचे उल्‍लंघन, भरधाव वेगाने स्टंटबाजी करणारे तरुण, बेशिस्त रिक्षाचालक आणि फुटपाथवर झालेले प्रचंड अतिक्रमण यामुळे संगमनेरकरांची रोजची वाट बिकट झाली आहे. या रोजच्या कोंडीतून संगमनेरकरांची सुटका कधी होणार, असा संतप्त सवाल आता नागरिक विचारत आहेत.

शहरातील विस्कळीत वाहतुकीला शिस्त लावण्यासाठी नगरपालिकेच्या वतीने दिल्ली नाका, अकोले नाका आणि बसस्थानक परिसरासह महत्त्वाच्या चौकांत स्वयंचलित सिग्नल यंत्रणा बसवण्यात आली. मात्र, अंमलबजावणी अभावी ही यंत्रणा कुचकामी ठरत आहे. अकोले नाका परिसरात घुलेवाडीकडे जाणाऱ्या रिक्षा रस्त्याच्या दोन्ही बाजूंना अस्ताव्यस्त उभ्या केल्या जातात. यामुळे अकोले रस्त्याकडे वळणाऱ्या बसेस आणि नवीन नगर रस्त्याकडे जाणाऱ्या वाहनांचा मार्ग पूर्णपणे अडवला जातो. यातच बसस्थानक परिसरातील व्यापारी संकुलांसमोर दिवसभर चारचाकी वाहने उभी केली जात असल्याने, बसस्थानकात प्रवेश करणाऱ्या एसटी बसेसला वळण घेताना मोठी कसरत करावी लागते.

सध्या गणेशोत्सवाचा काळ असल्याने बाजारात नागरिकांची मोठी गर्दी होत आहे, ज्यामुळे ही समस्या अधिकच भीषण बनली आहे. चौकांमध्ये वाहतूक पोलीस तैनात नसल्याने वाहनधारक उघडपणे सिग्नल मोडून पसार होतात. त्यातच भरधाव वेगाने दुचाकी चालवून स्टंटबाजी करणारे तरुण आणि रिक्षाचालकांची मुजोरगिरी यामुळे दररोज छोटे-मोठे अपघात घडत आहेत. शहरातील मोठ्या शॉपिंग कॉम्प्लेक्सजवळ पार्किंगची कोणतीही सोय नसल्याने खरेदीसाठी येणारे नागरिक थेट रस्त्यावरच वाहने उभी करतात.

दुसरीकडे, १३२ केव्ही ते दिल्ली नाका आणि जोर्वे नाका परिसरात मोठ्या प्रमाणावर अतिक्रमणे वाढली आहेत. रस्त्या कडेला असणाऱ्या फुटपाथवर फेरीवाल्यांनी ठिय्या मांडल्यामुळे पादचाऱ्यांना चालण्यासाठी जागाच उरलेली नाही. पोलीस, नगरपालिका आणि स्थानिक प्रशासनाचे या वाढत्या बेशिस्तीकडे पूर्णपणे दुर्लक्ष होत असल्याने संगमनेर शहर सध्या रामभरोसे चालले असल्याचे चित्र निर्माण झाले आहे. वाढत्या अपघातांना आणि कोंडीला आळा घालण्यासाठी प्रशासनाने त्वरित ठोस कारवाई करावी, अशी जोरदार मागणी नागरिकांमधून केली जात आहे.