डीजे व गुलालाला फाटा, सोमेश्वर मंडळाकडून महाराष्ट्रापुढे पुन्हा एकदा संस्कृतीचा आदर्श! मंडळाची गौरवशाली परंपरा; बाळासाहेब थोरातांच्या हस्ते आरती व पूजन, राज्यात भरपूर पाऊस पडू दे: माजी मंत्री बाळासाहेब थोरात यांची गणेश चरणी प्रार्थना

महाराष्ट्र संवाद न्यूज-
सोमेश्वर गणेश मंडळाने २००२ पासूनच डीजे व गुलाल बंदी करून संपूर्ण महाराष्ट्रापुढे एक आदर्श आणि शिस्तबद्ध परंपरा निर्माण केली. राज्यात निर्माण झालेल्या दुष्काळजन्य परिस्थितीवर चिंता व्यक्त करत विघ्नहर्ता गणरायाच्या आशीर्वादाने उर्वरित काळात संपूर्ण महाराष्ट्रात भरपूर पाऊस पडावा आणि शेतकरी व नागरिक सुखी-समाधानी व्हावेत, अशी प्रार्थना राज्याचे माजी मंत्री बाळासाहेब थोरात यांनी केली.
संगमनेरच्या १३१ वर्षांची समृद्ध परंपरा लाभलेल्या रंगारगल्लीतील मानाच्या सोमेश्वर गणपतीचे पूजन पारंपारिक पद्धतीने काँग्रेस पक्षाचे वरिष्ठ नेते, माजी मंत्री बाळासाहेब थोरात यांच्या हस्ते पार पडले. गणपतीच्या पूजन सोहळ्यास माजी आमदार डॉ. सुधीर तांबे, आमदार सत्यजित तांबे, आमदार अमोल खताळ, माजी नगराध्यक्ष दुर्गाताई तांबे, नगराध्यक्ष डॉ. मैथिलीताई तांबे, डॉ. जयश्रीताई थोरात, मंडळाचे अध्यक्ष रोशन आमले, कार्याध्यक्ष अभिजीत पाटणकर, प्रांताधिकारी अरुण उंडे, तहसीलदार धीरज मांजरे, उपविभागीय पोलीस अधिकारी डॉ. कुणाल सोनवणे, पोलीस निरीक्षक समीर बारवकर यांच्यासह शासकीय अधिकारी, मंडळाचे सर्व पदाधिकारी व नागरिक मोठ्या संख्येने उपस्थित होते.
बाळासाहेब थोरात म्हणाले की, डीजे बंदीबाबत सध्या राज्यात मोठी चर्चा सुरू असली, तरी सोमेश्वर मंडळाने २५ वर्षांपूर्वीच गुलाल आणि डीजेमुक्त मिरवणूक काढत पारंपारिक वाद्ये आणि खेळांना प्राधान्य दिले आहे. तसेच सकाळी मिरवणूक सुरू करण्याची प्रथा सुरू केली. ही अत्यंत कौतुकास्पद आणि महाराष्ट्राला दिशा देणारी परंपरा आहे. यावर्षी ग्रामीण भागात दुष्काळाचे सावट असल्याने शेतकरी हवालदिल झाला आहे. ईश्वर कृपेने धरणांमध्ये पाणी असल्याने शहराला दिलासा मिळाला असला, तरी संपूर्ण राज्यातील बळीराजाला सुगीचे दिवस येण्यासाठी उर्वरित काळात चांगला पाऊस होणे गरजेचे आहे.
आमदार सत्यजित तांबे यांनीही सोमेश्वर मंडळाच्या ऐतिहासिक परंपरेचे कौतुक करत, दुष्काळाच्या संकटातून मार्ग काढण्यासाठी पावसाची गरज असल्याचे सांगून सर्वांना गणेशोत्सवाच्या शुभेच्छा दिल्या. शहरात यावर्षीच्या देखाव्यांना नागरिकांचा उत्स्फूर्त प्रतिसाद मिळाला असून शांततेत गणेशोत्सव पार पडल्याचे त्यांनी नमूद केले.
नगराध्यक्ष डॉ. मैथिलीताई तांबे यांनी नगरपरिषदेतर्फे सण-उत्सवांसाठी करण्यात आलेल्या जय्यत तयारीची माहिती देत, सोमेश्वर मंडळाने साकारलेल्या जगन्नाथ पुरीच्या देखाव्याचे विशेष कौतुक केले. तसेच विसर्जन मिरवणूक शांततेत पार पाडण्याचे आवाहन केले.
या पूजन सोहळ्यानंतर पारंपारिक लाठीकाठी, शिवकालीन मैदानी खेळ आणि विविध प्रात्यक्षिकांनी मिरवणुकीची शोभा वाढवली. पारंपारिक वाद्यांच्या गजरात आणि अलोट उत्साहात रंगलेल्या या सोहळ्यास संगमनेर शहरातील महिला, युवक व नागरिक मोठ्या संख्येने उपस्थित होते.

विसर्जन मिरवणुक प्रारंभीची छायाचित्रे…